[愛情] [校園] [足球] 我鐘意左個第一句就講粗口嘅女仔: 38.

「嘩！睇下！」曉瑩指住海嘅方向同我講

我向前方望左望，太陽亦隨住水平線升起。

「好靚，真係百看不厭，同之前幾次黎比都已經係咁靚，估唔到會keep得到」我另番住個頭望住曉瑩講

曉瑩冇望番我，只係繼續望住日出，呢⼀刻嘅佢，好靚，真係好靚。「好靚啊真係」我唔為意地將我心境講埋出黎

「你話咩靚啊？係咪我呢嘻嘻！」曉瑩聽到我講多次好靚好似有啲好奇





「靚，日出同你都靚～」我細細聲講，隨便都可以讚埋佢，掂。

「係咪㗎～我地咁老友唔洗講客氣說話㗎喎」曉瑩望住我嘅眼神充滿懷疑

我笑左一笑，因為呢一刻嘅佢好得意　「你想聽真話定假話啊？」我問

「我兩個都要聽！」曉瑩講

「咁你想聽邊個先？」





「呃...假嘅先啦！」

「假話就係靚啊！都唔差啊！？」我用疑惑嘅語氣諗住玩佢

「咁....真話呢？」曉瑩愈黎愈緊張好想聽到我嘅＂真話＂

我坐直左個人，眼神望佢望得更加堅定，然後話。「真話係，好撚靚，無一班軍隊排住隊等溝你真係唔太明白，哈哈」

曉瑩聽到我講嘅說話之後，微微一笑然後講，「你唔好咁講啦，姐姐我呢會驕傲㗎，可能我有成班軍隊係到你唔知呢～嘻嘻！」





「嘩咁如果真係有嘅話，我同你兩你個人係到睇日出聽日咪比人接放學打死？」我舉高雙手扮住好驚嘅表情咁講

曉瑩比岩岩笑得更大聲　「我都係講下笑姐～邊有咁多軍隊啊，我自己知自己事啦！」

「但唔係喎，好認真咁講，你唔好話我講大話，但我覺得你樣貌同性格的確係好惹人喜歡。所以我先話有都唔出奇咋」我講

突然間好想話比佢知，欣賞你個個人一直係你隔離，陪你坐左成晚嘅男仔，但我始終未敢講出黎住。

「咁你咁講我就咁樣聽啦！信住你先啦！不過好可惜嘅係暫時我仲未搵到呢個欣賞我嘅人住，哈哈」曉瑩笑住咁答

睇黎都仲係未係岩時間講住，曉瑩亦都未發覺到我對佢嘅感情已經唔止係友誼咁簡單。

快樂不知時日過，話咁快已經傾到就黎七點，差唔多係時候要番屋企沖涼換衫同食早餐。

我望一望電話，已經係六點半，我即刻同曉瑩講「喂曉瑩，差唔多要番去換件衫再出黎啦喎，如果唔係就遲到啦」





曉瑩望左望電話「係喎！咁我地七點三係xxx站等好唔好？」佢問

「好啊～！咁我行番去㗎啦喎，今次就唔送啦。」我講

「好啦，我都好近姐～咁一陣見啦」曉瑩講完企左係身準備行番屋企。

因為個海旁係我地屋企嘅中間點，所以我地走嘅時候係相反方向咁走，有少少戲劇嘅情節咁。

我同曉瑩一齊企番起身，講完Bye Bye之後佢就另左頭走，我企係到望住佢行左一段路我先諗住行。

曉瑩行左十幾步之回頭望左望我，見到我仲企左係到佢笑左一笑，然後用手指住示意我轉頭走，我點點頭然後同佢揮左下手我都走左。

平時我係可以選擇踩單車番去，但我今日想行一陣等我回想下今日發生過啲咩事。因為呢一晚，我就好似活係童話世界一樣，我完全唔敢相信岩岩嘅事係真實。





既然曉瑩仲未發現到我嘅感覺，我唔肯定我應該要更加主動表達我對佢嘅感覺定係暫時停留係呢一個階段好。

始終我唔想無左佢係我嘅世界，雖然咁諗係好自私，但我的確想自私多一陣，我怕我表達完之後呢一段嘅關係會結束

我好享受同佢一齊嘅感覺，就算我無名無份都好，其實咁樣對我黎講暫時已經足夠。我驚嘅係如果我開始更主動去表達，會連最普通嘅友誼都無埋。

所以好似都係停留係呢個地步比較好，等我再了解佢多啲先再決定