[愛情] [校園] [足球] 我鐘意左個第一句就講粗口嘅女仔: 34.

係我康復嘅日子當中，每日就好似做緊個正常嘅學生咁，放左學冇得好似以前咁練波，頭兩個禮拜都未需要出度訓練，每日就係番學等放學。

日子過得特別慢，我同曉瑩都好少單獨講到野，我試過約佢出黎食糖水，但係佢話唔想我行咁多路，所以等我好番先出去。

唔知呢啲係體貼定係佢其實都唔係咁想見我呢，都係咁好諗咁多，但其實我有少少掛住曉瑩。

雖然我地有陣時係skype同電話打字都有傾計，但都冇單獨食糖水個種感覺咁強烈。

過左兩個禮拜，我都開始康復得七七八八，始終都係皮外傷，請一個月假都係預鬆啲。





我同啊婆都有坐係場邊陪住林sir同隊友們練波，有陣時就一齊聽下戰術，老實講我都仲驚緊就算我地真係康復好係咪真係有正選打。

始終後備球員都有努力練習，出佢地都好正常，比定個心理準備自己都好。

班際準決賽同決賽都已經踢埋，我決賽都有上陣，不過只係踢左一陣。

我地D班毫無懸念咁贏左，但係詳細都唔洗講太多，C班淨番後場嘅啊賢當然冇可能以一敵三，最後久守一失輸左比我哋一球。

始終我覺得我地贏都贏得唔光彩，就好似當年曼聯無左C朗一樣，C班冇左啊婆成隊波仲有邊個識進攻。





我哋贏左之後都冇特別慶祝，始終仲有更加大嘅事我哋要去專注，除左啊鋒，佢贏左之後勁開心，除哂衫咁。

曉瑩無黎睇，好似因為佢有朋友約左佢出去食飯，不過佢賽前都有同我講加油。

時間話咁快就黎到我地學界前嘅一個禮拜，雖然今年勝算不大，但係都要搏盡佢㗎啦，唔係點樣比個交代自己同大家。

由於我地第一年升B grade嘅原因，我地叫細B，要同大B嘅人夾其實都幾困難，主要係我地嘅踢法好唔一樣。

大B踢開用個人技術去創造入波，我地就比較上會用多啲傳波同直線。





我地嘅戰術都係圍繞住大B平時踢開嘅踢法去踢，老實講我係唔太喜歡呢一套踢法，但係無計啦，我地從來都唔會反對林sir比我地嘅戰術。

今年嘅理想嘅目標係入到八強，始終我地平時夾開個班有一半都仲係大C (C grade)，出到分組賽已經係偷笑。

練完波番到屋企我都開始執一執房嘅野，隨便食個晚餐。

一路食飯一路睇緊ig，咁岩依家IG有個潮流玩緊第一印象。有好多人都有玩，出哂貼文咁，包括曉瑩。

見到佢個貼文寫住 “跟下風～係下面留言我私底下同你講第一印象啦！” 

諗諗下，好似咁耐都無聽過曉瑩對我嘅第一印象喎，留個言聽下佢一開始見到我有咩諗法都好。

我即刻放低手上嘅匙羹，然後係曉瑩嘅貼文下留左句“Hi OvO” 見到除左我之外仲有好多人都有留言，同佢唔熟嘅都有好幾個。

隔左半個鐘都未有來自曉瑩嘅私訊，睇黎真係太多人要佢覆。





正當我攞緊睡衣去緊廁所沖涼嘅時候，突然床頭傳起 “叮”一聲，褲都除到一半嘅我即刻衝番去房睇電話，連我老母係廳見到都O撚哂嘴。

10:30pm llwhyll : 馬子朗 ! 你嘅第一印象係...唔講！留番我地搵日出黎食糖水我先同你講啦哈哈！我嘅糖水良伴～

我即刻攞起電話係房全裸咁覆機，10:30pm mtl1018 : 咁擇日不如撞日囉，你依家得唔得閒啊，出黎食糖水啦！

  10:31pm llwhyll : 但係我仲有好多未覆喎，我已經特登跳左去你度先㗎啦

10:31pm mtl1018 : 一路食一路覆囉，我好想知啊，快啲啦快啲啦！

過左兩分鐘，曉瑩終於覆左 10:34pm llwhyll ：咁半個鐘後老地方等啦

10:34pm mtl1018 : 想問老地方係邊到（問號表情）





10:35pm llwhyll ：咪平時一齊行過去之前個間Nike囉（反白眼）

10:36pm mtl1018 ：收到收到，咁一陣見啦 (笑喊)

我覆完呢句之後係房裸體咁大叫左句＂好野！！＂，其實話想快啲知個第一印象係假嘅，想快啲見佢先係真，當然我唔會係佢面前講出黎啦。

我係衣櫃拎左衫換完之後就出番廁所放番件睡衣番房，「喂，你夜媽媽做咩著住出街衫啊衰仔」老媽子係廳見到我經過問

「我出去食個糖水就番黎啦，好快，你訓先啦」我答佢

「女朋友啊？」佢問，「唔係啊，朋友黎㗎咋」我尷尬地回覆

老媽子聽到我話出去都番左入房訓，而我都差唔多時間出門口了

好興奮啊，過左兩個幾禮拜，終於有得同曉瑩二人世界傾下計食個糖水，諗起到開心。