[愛情] [校園] [足球] 我鐘意左個第一句就講粗口嘅女仔: 31.

＂叮！＂電話係我褲袋入面響起

黃曉瑩 8:50PM : ＂我可能要遲小小先到，十分鐘 ＂

我拎起手機回覆　8:50PM :＂咁我遲小小先出出門口啦～(笑喊＂

8:51PM : "咁不如你係地鐵站附近個間Nike等我我地一齊行過去？(水汪汪眼＂

8:52PM：＂好啊咁9點10分係Nike等啦～＂





今日都係著住普通嘅運動服，加對Air force1就出左去，反正平時都係咁樣出街。

我如實準時就到左個間Nike，曉瑩5分鐘後都到左，見佢著住校服睇黎真係無番過屋企。

「唔好意思啊遲左啲嘻嘻，岩岩份功課仲有啲手尾未搞掂要整埋先走得」曉瑩行到過黎第一句就道歉

其實見到佢道歉嘅時候傻笑到成個傻妹咁，佢唔道歉我都嬲唔落。

我即刻講「唔緊要啦，其實我都係岩岩到哈哈」





「好，咁我地行啦！我好想食柳槤啊！」曉瑩拉住我件外套行

佢拉住左我黎行，係咪代表到我地嘅關係己經又升華左呢。。

「唔該，我想要一份柳槤晶珠一份雪糕豆腐花！」我一坐低己經同左侍應講

「收到你！要咩味啊雪糕」侍應回頭問我

「係喎，曲奇啊唔該～唔記得左添」我回答





叫完之後，傾左陣閒計，講下近排我地級啲花生事，好快曉瑩嘅糖水就上到

曉瑩望住我望住佢碗柳槤，然後我望住佢笑一笑講

「你食先啦！唔洗等我」我同佢講

「好似好衰喎，又要你聞住啲柳槤，你又未有得食」曉瑩突然停手，好似有啲過意唔去

「唔會啦！我都已經對陣味道完全無事，你食啦！我個個應該都好快會到」我拎起左佢支匙羹放係佢手上

「咁我唔客氣啦嘻嘻！好耐無食過啦！超想食！」曉瑩望住碗野嘅眼神一如以往咁閃令令

曉瑩食完第一啖之後，即刻讚歎「嗯！好好食，係好耐無食過嘅味道啦！」

我扮無奈地講「我地好似上個月先食完咋喎。。」





曉瑩即刻反駁我「咩啊！一個月仲唔夠咩，對我黎講食柳槤晶珠兩個禮拜己經算好多㗎啦！」佢講完之後又繼續食

望住佢沾沾自喜嘅樣，我都笑左一笑，曉瑩嘅另外一面真係好得意，好吸引。希望佢淨係比我見到佢呢一面啦，因為我覺得自己應該真係鐘意左佢了

「你做咩望住我咁耐，係咪我塊面有啲咩野」我望得太入神都無留意到比曉瑩發現左添

「唔係啊，我係到發呆諗緊野咋嘛」我即刻解釋

「係咩！等我估下你諗緊咩先.....係咪.....啊！曉瑩又靚女左喎！」佢自豪咁笑住講

我聽到之後就笑住乘機咁講埋「咁呢個就梗係㗎啦！哈哈」

我好似見到曉瑩聽到我講之後面紅左一紅，唔知我係咪睇錯，之後細細聲講「我講下笑㗎咋...」





「但我講真㗎喎，你呢一面真係好靚唔係講笑」我嘗試唔興奮地講我心入面嘅諗法

「多謝你...但係我要再估！～」曉瑩比岩岩更加怕醜

「好啦你估啦！」我都回復番岩岩嘅狀態，嘗試令成件事唔好咁尷尬

「我估....你係咪.....諗緊班際個日嘅事」曉瑩問

雖然我岩岩係全心全意望緊曉瑩，但係呢幾日呢件事又真係經常性浮係我個腦入面

「係啊...自從個日之後我同啊行就無再講過野」我有少少失落地回答

「啊！！係喎！你隻腳依家點啊！？」曉瑩好似如夢初醒咁由重點係啊行到搬左去我隻腳到，雙眼瞳孔放大望住我問

「哈哈，考下你，你見我岩岩同你行個陣有無趷下趷下啊？」我反問曉瑩





曉瑩諗都無諗過就即刻舉手答左「無啊！」

「係啊，我依家普通行路都無咩問題，但係如果我要做運動，跑步個啲就未得住，因為仲會痛」我望住自己隻腳答

曉瑩聽到我講之後，即刻放低左手上嘅糖水，望住我霸氣地講「你一日未好番都唔準你再做運動！體育堂都唔比上！」

「我知道啊，我仲有學界要踢，當然要好好休養下。但係我同啊行都唔知點算，就算我好隻腳好番如果同啊行都仲係咁樣我都唔知點算」我低頭回答

「我覺得，你暪住佢地傷左去踢真係有錯嘅，咁但係佢咁樣鬧你都唔好。」曉瑩努力咁分析

「不如你試下自己主動同佢道歉？可能佢會原諒你呢，畢竟你的確係做錯左先」曉瑩結論後提出呢個建議

其實如果我主動道歉係咪真係可以同到啊行和好呢，以佢嘅性格我唔敢講，但的確曉瑩講得無錯，成件事係因我而起，我去道歉都係必須。





我諗左一陣同曉瑩講「嗯好啦，我聽日番學會主動搵佢道歉」

講到呢到，我地都食哂我地嘅甜品，正當我諗住拎出銀包埋單嘅時候，曉瑩已經一早攞走左張單跑緊去櫃檯比錢

我見到之後，即刻追上去。但係我跑緊嘅第一步，「啊！」痛楚即刻沿住叫聲傳左出黎，唔記得左自己跑唔郁，曉瑩聽到我大叫之後都另轉左頭，微笑地手指指向門口出面示意我係門口等佢

曉瑩呢一下，我被佢無聲嘅霸氣深深地吸引住，企左係到望住佢

極危險 連思覺像也失調