[愛情] [校園] [足球] 我鐘意左個第一句就講粗口嘅女仔: 30.

「喂衰仔，起身番學啦」啊媽如常地叫醒我番學，因為我聽唔到鬧鐘

我就住就住隻腳落床，今日落地個一下無前兩日咁痛，但行嘅時候都仲會痛，我估呢兩日無再做運動真係好左好多。

今日己經係班際比賽後嘅第三日，呢幾日都無乜特別，係比平時更加頹廢，因為我連運動都做唔到。

個人都無好似前幾日咁開心，無咁多野講，啊婆都放左兩日假休息。

我同啊瑩嘅情況都一樣無變，雖然我地係前後嘅鄰座，但我好少主動搵佢，佢亦都好少搵我，連平時同啊柔佢地一齊嘅講電話我都無入到去。。





我唔搵曉瑩嘅原因主要係唔想比佢見到我唔開心嘅一面，但的確我係比之前講少左好多野，包括上堂同係小息鳩噏

「喂！終於回歸校園，但係應該會好柒」啊婆同我行番學嘅時候指住佢隻包左石膏嘅手講

「無事啦，我都比人笑我行路慢，係喎話說你趕唔趕得切係班際前復出」我問

「我估應該唔得，可能我應該要過多幾個禮拜先，不過學界我估趕得切」啊婆回

我聽到之後即刻鬆一口氣「好彩姐，最緊要係學界大家都踢到就得，如果唔係實比人屌死」





「你同啊行點啊，仲有無講野？」啊婆問

「咪都係咁，無點講過野，佢好似仲嬲緊我，你呢？佢有無搵過你？」我失落地問

「有啊，佢尋晚打比我同我講對唔住，話唔應該亂落腳，我同佢都無咩野啦」啊婆解釋

唉，就連啊婆都同啊行無事，我都仲係同啊行一句野都未講，我係咪應該主動去道歉呢。

番到去，見到曉瑩都仲未番到黎，平時都係同我差唔多時間到課室，但今日我到班房過左十幾分鐘都未見佢。





其實我呢幾日都好想同曉瑩傾計，但奈何自己嘅心情真係未必做得到好似平時咁，有好幾次都想行埋去，但係一諗起個日同啊行嘅事就令我卻步。

過左兩堂數學堂之後，曉瑩終於係英文堂番左黎。佢入黎前同我對望左一下，笑左一笑，然後就坐左番埋位。

我終於忍唔住向後同曉瑩講左聲「早晨啊！做咩咁遲嘅」

曉瑩見到我向後問佢呢個舉動一開始嚇左一嚇，然後再微笑住回答「我今日訓到死左，本身諗住唔番㗎啦，但今晚有份功課要留係學校做，所以咪番左黎囉～」

「咩功課黎㗎，要搞到我地嘅曉瑩姐都番黎學校做哈哈」我問

「咩喎！講到我好似唔做功課咁，我有份IT嘅功課要用學校電腦做啊，佔左好多分，所以都無得唔做」曉瑩搖頭無奈地講

「哈哈，我好似無呢一類型嘅功課要做，得考試，咁你今晚咪做到好夜先番去囉？」我試探性地問

「係啊，做咩啊？」曉瑩好似知道我嘅用意





我怕怕醜咁問佢「咁不如你今晚做完之後我地去食糖水？我呢排無得練波好得閒....唉」

我講完唔洗練波之後嘅樣即刻頹左，佢意識到我個樣比平時唔一樣，即刻笑住問「係咪有啲咩事發生左呢，你今晚同我講啦！」

「係啊，但係仲未處理得到，咁....姐係你認承左？」我面已經紅到好似太陽咁

「係啊，照舊今晚同樣時間老地方等？」曉瑩雙眼誠懇地望住我講

我笑到口都收唔埋，好大聲叫左下「好啊！」我大聲到全班都望住我，見到我另轉左頭同曉瑩講野

「hey hey,long stop talking to your classmates」Miss Lau呢個時候開名鬧

我即刻另番轉頭道歉「Sorry Sorry Miss Lau」比在係平時啲老師我一定會唔理，但呢個老師咁鬼靚女，又係我班主任，點都要聽下話嘅





我坐番前個人嘅時候，隱約聽到後面嘅曉瑩細細聲講左句「傻仔，講野咪咁大聲啦，比人鬧啦」

我無再講野回應，係前面比左個ok手勢佢睇，然後就繼續發呆。真係無諗過曉瑩諗都唔洗諗就認承左我，係佢對我都有意思啊？定係佢真係純粹得閒當我係朋友咁出去食野呢...

再望一望遠處坐係後面嘅啊行，佢都好似同我一樣悶悶不樂咁，無笑過一樣，唔知佢係咪仲嬲緊我呢。

啊羊係比賽個日就己經無事，但係啊行唔同，佢仲好似好著緊個日發生左嘅事同我講嘅野。