[愛情] [校園] [足球] 我鐘意左個第一句就講粗口嘅女仔: 20.
入到去坐低，我地三個男仔坐一邊，對邊就坐住佢地三個女仔，咁岩我坐左係黃曉瑩對面
「你地食咩啊？我想食芒果西米露！」啊柔首先揀好食咩
「我要雪糕豆腐花！曲奇味嘅！」我之後講
「我要剉冰！士多啤梨味嘅」啊靜竟然咁快講佢食咩
啊銀同啊鋒都好快就決定左食咩，得番黃曉瑩苦惱緊食啲咩
＂佢唔係食柳槤嘅咩？正常應該唔洗諗咁耐㗎＂我自己諗緊
啊柔好似己經等唔到我地講，然後好急咁講「曉瑩，差你咋快啲揀啦」過左幾分鐘，啊瑩都仲未揀到
見到個好苦惱嘅樣，坐係我隔離嘅銀就問「你食唔食楊枝甘露啊，呢道嘅楊枝甘露好似都幾好食㗎喎」
「好啊，咁就楊枝甘露啦！」佢笑住講，但我睇到佢嘅表情好似有啲唔自然，唔知係我睇錯定點
傾多左陣計，甜品就好快送到。我食野食得比較快，好快就食哂個雪糕豆腐花，都係x方糖好食啲。
食完無野做就同佢地傾左陣計，對面嘅黃曉瑩都仲好慢咁食緊，近距離望住佢食野個樣真係幾得意，但係好似佢個樣有啲唔情願咁。
我都無係佢地面前問佢點解唔食柳槤，費事比人篤穿我地之間出過去食糖水啦。
「係喎，啊朗你係咪足球隊㗎？遲啲有個班際足球比賽，你諗唔諗住玩啊？」啊銀食食下糖水突然間問我
「玩啊！我應該會同林以行同啊羊佢地踢。」我答佢
「你地差唔差人啊，我都想試下踢足球比賽」啊銀問
其餘嘅人包括曉瑩嘅目光都係我身上，其實我係體育堂見過啊銀踢波嘅實力，一般般但係都好過正常唔識踢波嘅人嘅
好可惜我地今年嘅班別已經有四個足球隊嘅人，我，啊行，啊羊，同一個後備仔。但係佢咁樣問到我，又真係唔知點拒絕，加上黃曉瑩停左佢手上嘅楊枝甘露，好似等緊我答啊銀咁
我嘗試同佢傾下龍門嘅問題「因為我地個班有四個足球隊係度，如果你做龍門嘅話你OK嗎？」
「可以啊！雖然我未試過打龍，但係都可以試下嘅～」啊銀有興奮地答
「你放心啦，如果我地贏得多會有人同你換，你可以出去踢」我拍拍心口再望一望佢地，佢地都好似好有興趣睇
「你地會黎睇㗎可？我嘅處子戰啊！」啊銀踴躍咁問啊柔同啊鋒佢地，當然都包括曉瑩
啊柔都好似好有興趣睇佢踢，然後問佢隔離嘅兩位女仔「會啊！好似下個禮拜就開始啦喎，我地個日買個飯去一路睇一路食好唔好啊？」
「好啊～」曉瑩講，啊靜點點頭都應該無問題
好快我地就食完，都就快夜晚十二點，所以大家食完都番左屋企。
番到屋企，休息左一陣，本身諗住打陣機先訓，因為聽日係星期六。
係我開機之際，＂叮！＂ 2:30am＂你訓左未啊？＂曉瑩電話傳比我嘅訊息，
2:30am ＂未啊聽日放假啊嘛，都唔會咁早訓住＂我回佢
2:31am ＂啊柔話好悶訓唔著啊，我同佢同啊靜講緊電話，佢話不如叫埋你入黎傾計，你會唔會有興趣啊？＂
2:32am ＂好啊，你地邊到call？＂
2:32am "我比skype id你你加我啦＂
我加左黃曉瑩之後，好快就加左我入去，本身以為啊鋒同啊銀都有係群到，但見到個群組得三條女同埋我。
其實起初有啲尷尬，同三個女仔講電話，一陣講女人野嘅時候我又點算好呢，仲要係第一日先熟絡。
＂Hi ! " 我入到去第一句
＂喂！啊朗！你唔洗訓咩？我以為你唔會入黎添！＂啊柔見到我入黎好似有啲驚訝，都係嘅如果唔係曉瑩，我估我都未必會入去
＂係啊，聽日放假啊嘛，梗係hea多陣先啦！＂我答啊柔
＂你平日夜晚都係咁夜訓㗎啦，今日唔洗做賊咩？＂黃曉瑩用串串地嘅語氣問
我扮慘咁樣講「無啊，今日無得做賊，無野偷啊鳴鳴」
好快大家嘅氣氛都變到無咁尷尬，曉瑩同啊柔分享佢地相識嘅故事，我同啊靜就係到聽，我都有問下佢地啲搞笑野。我就講下關於我同班上啊行同啊羊嘅野，加上講下學校嘅八卦，啊柔同啊靜好快就訓著左。
得番我同啊瑩未訓，我再確實問左一次啊柔同啊靜係咪訓著左，佢地都無覆到我應該係訓著左啦？
「曉瑩，我有野想問你」我用個好似朋友嘅語氣問佢
「嗯？你想問咩啊？」佢有啲好奇我想問佢啲咩
我見佢地訓著哂，難得有獨處嘅機會講電話，梗係問番今日楊枝甘露嘅事啦
「你今日食楊枝甘露果陣時呢，好似有啲唔情願咁嘅」我單刀直入問佢
黃曉瑩聽到我問佢呢樣野之後個樣超驚訝，好似想同我講點解我會留意到咁樣
「咁叻嘅，我其實麻麻楊枝甘露」黃曉瑩講，聽到佢咁講，我即刻追問
「你揀楊枝甘露係因為唔想佢地面前食柳槤？哈哈哈」講完之後，諗番上次我同佢食糖水嘅時候開心笑緊
「叻啦叻啦！一陣佢地接受唔到點算！我都有形象㗎嘛！」黃曉瑩怕怕地醜咁講
「你係我面前咪無哂形象？你同我食糖水係食柳槤㗎喎！」我講笑咁講
佢即刻反擊「咁我下次唔食囉！我個日真係好想食啊嘛！哼！」
「唔係唔係，你一定要食！食自己唔鐘意嘅野邊到得㗎」我解釋
＂最好就淨係同我出去先食啦....＂我細細聲同自己講
「你講咩話？」黃曉瑩好似聽到我最後有講野但聽唔到我講咩
「無啊，我話你同我食嘅話食番自己鐘意嘅野就得啦！你嘅糖水良伴接受到」我講
「當然啦！係你面前我一定係唔需要形象！因為已經無哂，嘻嘻」曉瑩好肯定咁講
「我都訓啦，番學見啦！」曉瑩打左個喊露，佢都應該攰了
我都有少少眼訓，「嗯，早抖啦，下次再傾電話啦！」我溫柔地講
收左線之後，我都好快訓著左，估唔到黃曉瑩會打比我開始講電話，雖然唔係單獨嘅相處，但感覺咁樣傾計真係好似了解多左佢
如覺得 喜歡一個人 好比一首歌只有你可一起唱 ----- 陳奕迅《喜歡一個人》