[愛情] [校園] [足球] 我鐘意左個第一句就講粗口嘅女仔: 19.
番到屋企睇番啲相，循例都Post下ig，係張床睇番啲相，眼睛不自覺咁停留左係最後嘅一張相，不斷望不斷望
望望下自己會係到甜笑，呢啲可能就係青春吧
我張大部分同朋友嘅相都放哂上去ig入面，當然黃曉瑩嘅合照係Post嘅最後
加上多一張我自己影嘅銅牌，可能其他人見到都以為係好普通嘅一個牌，但呢個就當係得我同佢知嘅約定啦
完左運動會過多一個禮拜後就係班會活動，通常都係BBQ，今次都走唔甩。
今次BBQ都係我同黃曉瑩關係升華嘅轉折點
BBQ其實中點都唔係食野，最重要都係同班入邊嘅人混熟
開左學兩個月，今年入嘅班別都有少少陌生，有好多人都唔太熟，所以今次都係個好機會比我識多啲人
一開始都係男嘅一班玩，女嘅一班玩，見到黃曉瑩同啊柔同其他女仔傾得好開心
本身我想遼佢講野，但係好似呢個行為又有啲尷尬，好似阻住左佢地咁，所以我最後都無去
食左一陣野之後，就比班會主席叫左去玩「喂過一過黎玩遊戲啊！」
「今次又玩啲咩呢你估」我問坐係隔離啊羊
「應該都係啲破冰遊戲啦，仲可以係乜」啊羊答
班會主席好快就講野「我地分左三男三女先，一陣會有啲合作嘅遊戲會玩」
聽到之後，我望左一望黃曉瑩，啊柔見我望緊佢地嘅方向，好快就過左黎問
「你一唔一組啊？我地差男仔」啊柔問
「好啊！我地都搵緊組」我即刻答應佢
好快我地嘅組就成左形，有我，一個叫啊鋒，一個叫啊銀，女嘅就有啊柔，曉瑩同啊靜
唔好問啊羊去左邊，佢比啊行拉左去同佢女神一組，得番我一個係度戇鳩鳩
不過都算啦，識下新朋友都唔錯，反正我都可以同黃曉瑩一組，我完全唔介意佢地丟低我哈哈
「哈囉，叫我啊朗就得啦」我首先同啊鋒，啊靜同啊柔介紹左自己先
啊柔都好快介紹左自己，佢地都笑住介紹自己，感覺幾nice
「哈囉，我叫啊柔，隔離呢位係啊靜」啊柔幫佢介紹埋
啊鋒同啊柔都好講得野，感覺佢地好健談，同我性格都幾夾。
呢個啊靜真係人如其名，我地傾左陣計佢都無點講野，不過都可能佢怕醜啲姐
＂我地玩收賣佬！大家準備好未啊！＂主席大叫道
＂第一樣簡單啲，我要三隻鞋，唔同款嘅！＂
我同啊鋒二話不說就除左自己隻鞋，但其他人就好似唔太願意咁
「曉瑩係你啦，差你一隻」啊柔唔想自己除想試下叫人除
曉瑩個樣都有啲唔情願，但最後都除左交左比我行出去比主席
我偷望左鞋號，原來都唔細，可能係佢高嘅關係，都有39號，可能遲啲有啲咩事要送禮物都有用啊嘛，唔好講我痴漢住
我行番黎嘅時候，大家都係度笑緊，有講有笑，睇黎大家都已經打成一片
玩多一陣小遊戲之後，我地六個都熟絡左，大家都傾緊啲深入啲嘅問，好似好朋友咁樣相處
玩完小遊戲之後，我地大家都坐埋左一齊燒野食，傾下八卦咁，好快就混熟左
食完野執野之後，「你地之後有無下場啊？」啊鋒問我地
「無喎」「無啊」我地紛紛回答
「咁不如我地六個搵啲野做吹多陣水啊？」佢好似仲想玩多陣
我第一個答佢「我無所謂啊，反正聽日放假」
「好喎！我想去食甜品！」啊柔即刻講
「咁一係我地去附近糖水鋪睇下囉？」啊銀都似乎有興趣
當我聽到糖水呢兩隻字嘅時候，我雙眼第一時間望左望啊瑩笑左一笑，佢都望住左我
「啊瑩啊靜你地去唔去啊？」我問
啊瑩點頭回應「好啊！」啊靜無講野，但我估佢都應該會跟嘵瑩
xxxxxx
「我今晚同佢地走啊，你地自己搞掂啦」我行過去同啊羊同啊行講
啊行都好似無諗住理我，佢都淨係掛住佢女神「得啦，我都要同女神BB豬走，你去玩得開心啲啦～」
就係咁，我同啊行啊羊分開左，我跟啊鋒佢地三男三女食甜品，啊行就同女神走，啊羊....我都唔知佢點算
行緊去糖水鋪嘅時候，大家都己經熟絡得七七八八，有講有笑好似啲識左好耐嘅朋友一樣
我同黃曉瑩都傾左陣計，講緊關於今日班會活動嘅鎖粹事，同埋問左少少問題
「啊靜好似真係好靜咁，但相反啊柔就調返轉，佢地平時同你傾計都係咁㗎？」我好奇一問曉瑩
「係啊！啊靜平時同我地傾計都好少講野，今日可能再少啲囉，佢做開聆聽者嘅。相反啊柔就多野講啲，好多野分享，而我呢大概就係佢地嘅平衡點啦，我地識左咁多年都係咁樣相處」黃曉瑩回答
「你地識左好耐㗎啦？」我聽到佢話識左好多年
佢即刻數手指「識左....一二....三...四....四年半到啦!」佢數手指認真諗緊野個樣，好得意....
原來佢地都識左咁多年，同我班足球隊撚樣差唔多
「睇唔出啊柔咁快就混熟左我地班男仔」我同啊瑩講
曉瑩聽到之後好似唔太高興「乜依家我混熟唔到咩？我都同佢地有傾有笑㗎喎！」
「唔係唔係，我係想講佢好多野講姐～」我即刻道歉
「哼！你依家係間接話緊我，我都好易同人混熟㗎喎！」黃曉瑩兩面通紅，嬲爆爆咁
「大佬原諒我啊！我表達能力唔好，對唔住啊！我真係唔係咁嘅意思」我有啲不知所措，唔知點樣先可以氹到佢
突然，曉瑩偷笑左兩聲「哈哈」「玩你咋！我知你想講啲咩！」
原來佢係玩緊我，扮嬲....我個下真係驚到仆街，好驚佢真係嬲左我
我呢一刻對曉瑩嘅感覺究竟係點呢？我會唔會話我鐘意左佢呢？定係仲係停留係好感嘅階段呢
我會好想了解佢多啲，知道佢鐘意啲咩唔鐘意啲咩。因為曉瑩到依家比我嘅印象都係帶有一種神秘嘅感覺，雖然係比以前熟絡左好多，但都仲有好多野我係未知道。而佢就有一種魔力吸引住我去探索佢，呢一種感覺係其他人比唔到我。
「到啦，唔該有無六位啊？」啊鋒向服務生發問。正當我仲諗緊嘅時候，己經到左糖水鋪
算啦，呢啲野都係順其自然啦，我都唔知自己諗緊啲咩。