我次次拍拖都拍唔長，因為我……: 大結局 《阿希篇》

話說燒嘢食果陣氣氛都良好，係家姐西口西面個樣比較面目可憎，睇嚟佢真係好憎阿叔，食完嘢到尾聲果陣，家姐話「煲咗糖水啊，我去廚房攞，細佬你嚟幫手」

之後我跟咗佢入廚房，佢話「你做咩要叫埋個阿叔嚟」
我話「有咩問題，我帶我男朋友嚟屋企都唔得？你以前都趁老豆唔係到帶條仔番屋企喇」

佢話「痴線，點可以相提並論，性質上都唔同」我話「性質上係一樣，係性別唔同姐，因為唔係一男一女所以唔係正常嘅情侶？」

家姐畀我寸到冇聲出，或者佢根本都懶得同我理論，所以佢選擇唔出聲靜靜咁𢳂糖水，將符粉倒咗落其中一碗糖水到話「呢個紅色碗嘅加咗料，畀老豆飲，另外...你同大叔嘅嘢唔好同老豆講，我怕佢接受唔到」

心諗，接受唔到果個係你姐，關老豆咩事，成日道德捆綁我我宜家做啲嘢好唔道德咩，我條氣勁唔順囉，我捧住啲糖水出咗去





畀咗紅色果碗老豆，又隨手畀咗碗大叔，老豆一路食一路問「做咩啊，嬲爆爆咁款，又同家姐嘈啊？」好神奇地見到老豆每食一啖，佢頸上嘅紅線就開始變淡，好似慢慢咁消失咁，睇嚟啲符粉都有效

我話「老豆啊，如果我坦白同你講，我係基嘅你會唔會介意？」

係我身旁食緊糖水嘅大叔嚇到濁親，我下意識幫佢拍拍背脊，大叔呆咗咁望住我，或者佢冇諗過我會咁坦白同家人講我哋嘅關係，我望下老豆有咩反應，老豆反而好淡定咁食住糖水，笑笑口講「基咪基囉，你覺得開心咪得囉，同埋你肯咁坦白同我講，我應該開心就真，有咩介唔介意」佢仲搭住大叔搏頭，對住大叔講「我個仔就交畀你喇，希望你好好對佢」大叔點點頭答應

我好感動啊老豆竟然冇好似家姐咁，用住有色眼鏡望我，我眼尾掃到家姐企咗係出嚟花園個玻璃門隔離，擺出一款卓韻芝式嘅港女嫌棄樣，可能老豆想緩和下個氣氛，佢話「企係到做咩姐，過嚟一齊食糖水喇，阿妹」

家姐過咗嚟坐咗係老豆隔離，老豆嘆咗一口氣話「既然細佬都咁坦白，我都有樣嘢想同大家講，我呢...想再婚」





家姐嚇到連食緊啖糖水都噴咗出嚟，佢話「你...要結婚個對象唔係珍姐啊？」聽家姐講珍姐可能係落降果個人嚟

老豆話「係啊，我同佢都好投契，爸爸老喇，想老年搵番個盤」家姐話「但...但係佢可能....」家姐想爆落降呢單出嚟，但又唔好意思講出嚟，所以我直接幫佢表達成件事出嚟，我話「老豆，唔怕老實講句，你早排被人落降，我搵咗師傅睇，佢話你中咗情降，姐係對方想控制你，影響你嘅異性緣，我同家姐諗緊呢件事係咪同珍姐有關」

老豆話「我知啊，係阿珍落我降，佢都坦白同我講咗，佢怕我會出軌，好似佢前任老公咁，佢以前老公因為爛滾所以離咗婚，為咗令佢安心啲，我答應畀佢落降，講真中咗降咁耐我都冇太大影響」

原來老豆一早知，果然係愛的迫降，家姐話「但係呢，我哋幫你解咗降」佢指一指老豆手上碗糖水，老豆話「算喇，冇所謂，我會同阿珍講番，你哋介唔介意多個媽媽？」

我話「無所謂，老豆你覺得開心就得喇」家姐見狀隨即附和「搵個盤都好嘅」





冇諗過今日大家都咁坦誠相對，我又坦誠地出櫃，如釋重負，就係咁我繼續同大叔同居，老豆冇耐都再婚，大家大團圓結局，bbq ending

多謝一直有追嘅讀者，日後會出唔同類型嘅故，希望大家可以多多支持