我次次拍拖都拍唔長，因為我……: 家姐篇
話說點咗細佬去搵聰哥之後，我捉咗老豆一齊買餸，諗起聰哥話老豆要飲符水辟邪，所以我同老豆講「老豆，今日燒嘢食怕熱氣啊，不如整綠豆沙食降下火囉？」諗住之後偷偷加料畀老豆飲，咁就可以神不知鬼不覺
老豆話「好啊，我都好耐冇食過綠豆沙，我係印尼果陣都係得腐竹雞蛋糖水飲」
我話「你哋係宿舍自己煲？」老豆搖搖頭話「唔係我哋港職同事煲，係宿舍有個姐姐煲畀我飲」
我話「姐姐？咩人嚟」佢話「係宿舍嘅清潔女工嚟，上咗年紀四五十歲，份人都幾nice,佢係印尼華僑嚟，所以都識啲廣東話」
我話「佢成日煲糖水請同事飲？」老豆笑笑口話「嗯....其實嚴格嚟講佢好似淨係煲嘢畀我飲」
心諗，淨係煲嘢畀老豆飲
咁奇怪，唔通佢暗戀老豆？我忍唔住咗追問落去，話「佢係對你咁好定對其他港職同事都咁好？佢仲有冇進一步嘅攻勢？」老豆話「話說有一次我做完嘢係工廠飯堂食晚飯果陣見到佢，佢叫珍姐，咁食完飯都冇咩做就同佢吹下水，之後愈傾愈投契，有次我話想食腐竹糖水，第日我番宿舍房就見到佢擺咗個煲溫壺係我枱頭，仲寫咗張紙條畀我，叫我趁熱飲...」
老豆一路講一路咀角含春咁笑，老實講，我唔反對老豆有第二春嘅，畢竟佢同媽子都離咗婚咁多年，臨老搵到盤都係好事嚟，但我聽完佢咁講，覺得個珍姐好古怪
都唔知會唔會係啲糖水落降，搞到老豆中邪