我次次拍拖都拍唔長，因為我……: 阿希篇
今日大叔出咗去見工後，我收到阿謙媽咪wtsapp 通知話阿謙情況好轉，冇之前咁嚴重，而且醫生仲話搵到合適嘅肝臟畀阿謙進行移植，雖然我冇宗教信仰，但我琴晚臨訓都祈禱，希望佢大步擸過平平安安
之後家姐打電話俾我，叫我番嚟屋企執吓啲嘢，因為之前我買咗新figure,啲野唔夠位開，鵲巢鳩佔咗老豆間房，擺咗啲中學教科書係佢房到，所以我都答應咗佢一陣會番屋企執嘢
我見大叔未番嚟，佢應該未見完工，怕佢擔心我唔知去咗邊，所以我wtsapp咗佢話一陣會出門，其實我都有啲淆底，諗緊屋企仲會唔會有好多朋友仔，家姐宜家都番咗工唔係屋企，屋企得我一個係到執嘢，我都驚啲朋友仔搞鳩我，阿儀本身都有提議陪我番屋企執嘢，但我覺得成日要佢陪住我唔太好意思，所以我叫佢留係大叔屋企，自己一個番去算
呢排係大叔屋企實在太悶，我臨走唔記得攞埋部switch
呢幾日都冇機會打悶到嘔，我今次番去除咗執屋之外，仲打算拎埋遊戲機過大叔到就係咁我一條友番咗屋企，計落我都係大叔到住咗四日，我膽戰心驚咁打開屋企道門，係門隙到望入去，睇下有冇咩唔尋常嘅嘢，結果發現咩都冇，鬼影都冇隻風平浪靜，之後我入咗去打開廳燈，正當我閂門之際，我見到門後痴咗張符，我當堂嚇呆咗，心諗...道符咁似大叔屋企果道符嘅
都係啲茅山符果類，我打開電話相簿對照緊啲字嘅模樣，第一眼睇兩者啲字都好潦，但筆跡都非常相似，起碼八成以上似，我即刻用電話影低屋企道符，打算留低證據同埋同阿儀商討呢件事我好快手執完啲嘢，再攞埋個switch就番咗屋企，係搭車嘅途中我wtsapp家姐「我執完嘢喇，啱啱搭車走咗，番緊去大叔到」家姐話「吓，屋企宜家都冇嘢喇，你番嚟住啦不如，老豆知你唔係到住，到時以為係我迫你走啊」我話「我真係有啲嘢要處理，呢排都番唔到嚟住，我聽日會同老豆解釋，你唔洗擔心，題外話，屋企之前咪請咗師傅嚟睇嘅，想問知唔知個師傅叫咩名？」
家姐話「佢花名叫聰哥，你問嚟做咩？」聰哥！又會咁啱連個名都有個聰字，唔通佢就係殺阿儀嘅兇手
我情急下作咗個大話「冇，我朋友屋企都好似撞咗嘢，想搵師傅睇睇，你有冇個師傅嘅聯絡電話？」家姐轉發咗張類似係卡片咁嘅嘢畀我，我即刻對下個名，個師傅全名叫譚耀聰，個名又唔太吻口，阿儀同我講過，佢男友個名叫陳振聰，唔通唔係同一個人嚟，不過符嘅字跡的確太似，可能都係證據嚟，我打算即刻番去話呢個消息俾阿儀知