我次次拍拖都拍唔長，因為我……: 大叔篇
屌那星，今日番office執嘢都撞正個八婆，心情好差
不過阿欣好彩主動約我食晏farewell，心情先叫好番啲，話說其實我仲未死心，我想繼續追佢，我打算一陣食飯再向佢表白，採取多一次強硬攻勢，希望佢會接受我我執完嘢刻意早啲去到新開間cafe攞位，因為呢間嘢一到lunch hour就好多人，平時番工根本就冇機會食到，每次行過呢間cafe 都聞到陣陣嘅咖啡香氣，阿欣都話過想幫襯，可能係畀呢間店嘅簡樸文青風格吸引到，我十一半就攞咗位係入面坐住等，諗緊一陣點樣開口會比較好，腦入面不斷編緊對白，雖然唔係第一次表白，但都係好緊張，我一路等阿欣一路望錶，想啲時間快啲過，想佢快啲嚟到
去到十二點搭二左右，阿欣終於到，我揮一揮手示意我坐咗係咖啡店嘅中間位置，阿欣話「sorry,遲咗啲，你叫咗野食未？」我話「未啊，打算等埋你先一齊叫」
其實我都一早諗定食咩，阿欣望住menu 睇緊有咩食，我趁呢個時候打算開口撩下佢講嘢
我話「話說，我之前咪有陰陽眼嘅，我宜家變番正常喇，冇咗陰陽眼嘅能力」阿欣停完我呢句，即刻放低menu 問「吓，你點做到㗎？搵師傅做咗發事？」睇嚟佢對我陰陽眼嘅事感到有興趣，不過我都唔可能老實咁同佢講出冇咗陰陽眼嘅原因
所以我講咗個大話我話「係啊，搵咗師傅處理咗....宜家同女仔拖手都唔驚會嚇親人哋，唔會過咗陰陽眼畀人，可以好好咁拍拖」佢話「咁咪好囉，解決咗你一直以來嘅煩惱，講真第一次畀你拖住果吓真係覺得好恐怖....」
我即刻打蛇隨棍上
捉住阿欣嘅纖纖玉手，話「以後拖住我都唔洗驚，唔會再見到鬼」阿欣個樣好錯愕，反射動作咁鬆開我對手，本身我以為佢怕再見到鬼，所以咁大反應，點知佢開口嘅下一句說話對我嚟講先係最可怕
佢話「sorry啊，我有男朋友㗎啦，所以我哋冇可能㗎喇....」我果下心入面好似出現咗鄭家穎咁不停大叫，我問自己點解會咁㗎，佢幾時出咁pool，點解我會唔知
枉我仲以為有一線希望，可以同佢起埋一齊，宜家竟然俾佢當面拒絕，我嘅心情即刻跌到落谷底之後我哋成程飯都食到好尷尬，大家都冇咩出聲，匆匆忙忙咁食完買單走人，對我嚟講呢個消息仲慘過我畀人炒