我次次拍拖都拍唔長，因為我……: 阿希篇

我問「醫生話你嘅情況點？」阿謙皺住眉頭講「宜家要等合適嘅屍肝，如果冇嘅話可能我挨多一星期就會死....其實我最唔捨得係我父母，屋企得我一個獨子，我死咗嘅話都唔知邊個照顧佢吔」聽到佢咁講，我都眼濕濕有啲想喊，阿謙搭一搭我膊頭，想安慰我叫我唔好咁難過，本來應該係我要安慰佢，但反而係我忍唔住想喊

阿謙話「估唔到你會願意嚟睇我，我之前咁衰，害到你咁，我本身都冇勇氣再搵你，因為我覺得好羞恥，但我希望我身前可以親口同你講聲對唔住，等我唔好帶住遺憾咁離開，對唔住，因為我中學幼稚嘅行為害咗你一生，我唔奢望你會原諒我，但我好想傳達我嘅心聲你知...」

我當時喊到九彩，忍唔住攬住佢話「傻啦，話咗係好兄弟就一世係好兄弟，邊有隔夜仇，你一定要大步擸過，好番要同我去grad trip 啊，當年你應承咗我要去㗎，唔準走數」

講完呢句，阿謙身後嘅女鬼想干擾我哋，唔想我繼續攬住佢男友，佢捉住我隻手，果下我覺有股凍由我隻手臂傳到我全身，即時打咗個冷震呢隻鬼唔似係我平時見開嘅鬼咁，完全唔同級數，直頭似係打機啲boss 級，我果下都鬆開手唔敢再攬住阿謙，我陪咗阿謙一陣，見佢有其他朋友嚟探佢，我之後就走咗

我離開咗病房果下好似如釋重擔，再feel唔到果下壓迫嘅氣場，一路行阿儀一路講「你朋友病到咁，九成都係個隻背後靈搞出嚟」我話「我都估到，果隻嘢好撚猛，直頭係有股殺氣，頭先佢個樣想殺咗我咁」





阿儀話「我估有可能係佢想帶埋個男仔落去陪佢，再咁落去，就算你朋友換咗肝都可能會繼續病落去」

我話「咁點算啊，係咪要諗方法趕佢走」阿儀話「同佢父母講，叫佢搵師傅嚟做吓法事？」我話「我咁講人哋會唔會以為我係痴線佬㗎，再者阿謙不嬲唔信呢啲鬼神嘢」

阿儀話「咁....不如你試下搵隻女鬼講數？叫佢收手唔好再搞阿謙？」心諗，當我張家輝陀地驅魔人咩講數，邊有咁易，我話「對家好猛喎，怕唔怕講唔掂數佢會搞埋我」

阿儀話「都冇計㗎啦，宜家阿謙情況只會愈嚟愈差，唔盡快解決，阿謙就死梗」聽完佢咁講都覺得呢單嘢的確要快啲處理

我話「咁啦，聽日我再去探阿謙，搵隻鬼講數，你一齊跟埋嚟，有你磅住感覺會安全啲」阿儀點頭話好





唉，其實我都好撚驚，帶住隻lv 5嘅比卡超，走去道場挑機咁款聽日講嘢小心啲，希望唔好激嬲隻鬼