我次次拍拖都拍唔長，因為我……: 家姐篇
話說細佬走咗後，我約咗個茅山師傅嚟，果日我本身要番工，但都刻意攞咗假
到咗約定啲時間兩點，我企咗係村口，打算接埋師傅先一齊番去，講真雖然日光日白，但要我一個人自己番去都淆淆地
我離遠見到個阿伯行過嚟，佢腳步蹣跚，撐住柺杖慢慢行埋嚟，睇落滿頭白髮，雖然係咁，但佢都好有中氣，我同佢相隔十幾米遠，當時佢大聲問咗句「係咪謝小姐啊？」我話「係啊，你就係聰哥啦？」佢話「係啊，你屋企係附近？」我話「係，行兩三分鐘到」我打量咗佢一下，佢睇落六七十歲，心口掛住咗塊玉，睇落唔覺佢係啲茅山師傅，似個普通嘅阿伯
我見佢行路都唔係好方便，刻意行慢啲就佢，一路行一路傾偈，佢問「阿妹，你幾時發現屋企唔妥？」我話「其實都早一兩個月開始唔妥，因為我長期都番工，唔係屋企嘅，但細佬佢成日都係屋企，佢同我講過屋企有啲唔妥，例如廁所會無故有沖廁聲，但明明冇人用緊廁所，夜晚個廳會有拉枱拉櫈聲果啲，本身我都半信半疑，因為我冇目擊到，但琴晚屋企就真係唔多妥，我同細佬同埋佢朋友玩碟仙，之後feel到屋企真係有野，我有一刻聽到屋企有怪聲，好似好熱鬧好多人咁......」
佢笑笑口帶住譏諷嘅口吻講咗句「唉，你地啲後生仔真係唔識死，九成瀨嘢嘅都係走去玩靈探，玩碟仙，次次都係出咗事先嚟驚」畀佢串完我都冇聲出，我都唔打算搏佢咀，因為呢刻我都要靠佢幫手驅鬼
到咗屋企門口，我都有啲驚驚地，我小心翼翼咁打開門，我打算叫師傅入咗去先，之後我跟住佢入去，聰哥望住個門都未入去就話「嘩，咁多隻嘅，你屋企開party啊？」我心諗
隔咗成晚班嘢都仲未走？聰哥入到去打開咗個廳燈，係佢個背囊攞出咗一個大葫蘆，我問「師傅，呢個咩嚟？」佢無理我，口中唸唸有詞咁講咗堆我聽唔明嘅嘢，好似啲喃嘸佬咁，佢都唸咗成兩三分鐘，之後佢再巡吓間屋行咗個圈
去到我間房，佢講咗句「阿妹，睇嚟係你啲衫出事喎，啲衫邊到買架？」我呆咗呆，本身仲諗緊佢係咪神棍，會唔會冇料到，但佢講嘅嘢同細佬一樣，話係我啲衫帶咗啲朋友仔入屋
我戰戰兢兢咁講咗句「er....係online shop 買，二手衫嚟」佢話「唔怪之得啦，你呢堆都係故衣嚟，死人衫嚟，啲嘢附咗係上面，所以你屋企先咁猛」我話
「咁點處理啊師傳？」佢話「冇㗎啦，dum 晒佢啦，頭先我用葫蘆都捉咗三四隻，但捉唔晒，數量太多，本身都應該有七八隻，另外幾隻驚得濟走咗佬」我話「吓，走咗？會唔會入番嚟？」佢笑笑口話「會㗎，所以我要畀啲嘢你鎮住間屋」佢係佢背囊攞咗張符出嚟，貼咗係我大門後面，佢話「呢到符可以鎮住啲嘢，好似個結界咁，佢哋就入唔到間屋，所以千其唔好撕走佢」我話「明白，唔該你啊師傅，啲衫我會拎去村口垃圾站dum 」我係銀包攞咗三千蚊出嚟「師傅呢到三千蚊，麻煩晒你」佢收咗三千蚊之後同我講「你以後都唔好再買呢啲二手嘢，好易出事」我話「明白，唔該晒你
」佢話「你再有咩問題就打電話畀我吧」