我次次拍拖都拍唔長，因為我……: 女鬼篇
真係唔好彩，望到佢間鋪轉咗做間咖啡店，果下真係好失望，突然間阿希電話響起，但佢果下個樣面有難色，望住個電話好似猶疑緊聽唔聽電話好我問「邊個嚟？傳銷電話？」佢搖搖頭話「唔係啊，有個朋友打畀我」我話「咁做咩唔聽？」佢話「係阿謙打畀我....我冇勇氣聽」
以我記憶，阿謙應該係阿希之前暗戀果個男仔，但佢都好衰，當眾奚落阿希，搞到佢學都唔敢番，唔怪得之佢咁猶疑聽唔聽好，電話響咗半分鐘，阿希突然吸咗一啖大氣，鼓起勇氣聽咗個電話，阿希話「喂.....係啊，好耐冇見啦，呢排點？....吓，咩話？咁嚴重.....入咗醫院？......er .....呢排我都得閒嘅，好....我會嚟探你，嗯....好啊，聽日見吧，你保重，bye」
聽完電話後阿希個樣變得好不知所措，我問「咩事？」佢話「阿謙佢.....有cancer 好似末期，佢話想見下啲舊朋友最後一面
」佢講到眼濕濕咁，我話「你唔係應該開心咩，個衰人有報應」佢話「佢頭先講野時好似呼吸都唔暢順好辛苦咁.....我哋曾經都係好朋友好兄弟，我都唔想見到佢咁....所以我決定去探佢，陪佢最後一程」睇嚟阿希真係個多愁善感嘅細路