我次次拍拖都拍唔長，因為我……: 阿希篇

大叔入咗廁所，我聞到陣陣煙味，睇嚟佢係入面煲緊煙

我問女鬼「我可以點幫你啊？你不如講下你嘅背景我聽下」

女鬼眼濕濕咁話「我好耐之前識咗個男人，本身我以為我可以同佢一生一世，佢會娶我，點知佢原來係一個忘恩負義嘅仆街嚟」佢開始豪哭，喊到講唔到嘢，我安慰佢話「唔好咁啦，你冷靜啲，將成件事嘅始末話畀我聽，睇下我點幫你啦」

佢慢慢開始冷靜番，哽咽咁講「個衰人叫阿聰，佢本身係個風水佬嚟，我第一次遇到佢係因為陪個姐妹睇相，果排我朋友比較運滯，頭頭碰著黑，話想睇下相化災，咁我哋就去咗某間風水店，當時我哋遇到阿聰，佢睇落去斯斯文文，待人有禮，又好識講嘢，本身只係我朋友想睇相，但講講下搞到我都想幫襯，結果我哋都一齊睇相，大家言談甚歡，好似朋友咁有傾有講」

我話「之後點，佢點解要害死你？」





佢話「我同佢好快就熟落咗，識咗佢短短兩個月就開始拍拖，一直大家嘅關係都好好，我哋仲拍咗八年拖，我將所有青春都畀晒佢，諗住將來可以結婚，組織美好嘅家庭，點知突然有一日，佢打電話畀我，好冷淡咁講咗句「我哋分手喇」我一下止接受唔到，癲咗咁問「點解啊，係咪我有咩嘢做得唔好啊，我可以改啊，點解要分手啊？」佢話「我識咗第二個女人，我哋嘅關係完㗎啦，你唔好咁死纏爛打喇」我完全接受唔到呢個殘酷嘅事實我一直想挽救呢段感情，我試過係咁打電話畀佢，結果佢轉埋電話避我，我寫信寄畀佢話，「我唔可以冇咗句，如果你離開我，我會自殺」我用盡所有辦法試圖令佢回心轉意」

我話「唉，我都明白你感受，畀最愛最信任嘅人背叛的確好難受，但佢都變咗心，番唔到轉頭㗎喇...」佢打斷我嘅話，好激動咁講「我知我知呢件事都番唔到轉頭，但我當時仲好傻好天真，覺得佢會番嚟我身邊，有一日我收到個無來電嘅電話，原來係阿聰打畀我，佢話「聽晚我想嚟你屋企，同你講清楚」我當時仲打算把握機會，面對面咁游說佢，點知呢個係陷阱嚟，佢處心積慮想殺我...」

我話「咁賤話晒都拍咗咁多年拖啊，洗唔洗咁盡啊？」

佢話「果日佢買咗枝紅酒上嚟，話想同飲住酒慢慢傾，點知其實佢枝酒加咗料，我當時唔知，淨係覺得愈飲愈眼瞓，冇耐我就失去咗知覺，佢之後係我間屋都閂晒啲窗，燒著個炭爐，想焗死我，扮到我好似自殺咁」

我話「吓，啲差人冇查呢單案㗎咩，點解唔睇閉路電視唔係應該會見到佢上過嚟你屋企殺你咩？」





佢話「果時邊有咁多cctv 啊，我死果陣都九零年，再者呢棟舊唐樓都冇閉路電視，同埋我之前寄過啲信畀阿聰，話過我會自殺，啲差佬都覺得我係自殺多所以都冇查，當係自殺案處理」

突然間，大叔電話響起，阿叔一枝箭咁標咗出嚟，聽佢講嘢嘅內容都知佢係串緊個八婆上司佢仲好狗，屌完個八婆即刻收線，好似覺得自己贏咗咁，完全係精神勝利法

之後佢仲好風騷咁講「落街食下午茶，我請」我都見有啲餓，點頭話好，換番衫跟咗佢落去