我次次拍拖都拍唔長，因為我……: 阿希篇

點解會咁突然間變咗我有陰陽眼，真係慘過被命運選中嘅孩子.....雖然睇落去佢哋同人個樣冇咩分別，無七孔流血血肉模糊咁款，但見到佢哋突然彈出嚟都咪話唔驚，我心驚膽戰咁匿埋係大叔背後，聽到個女鬼繼續講「你放心，我唔係想害你，我哋唔會好似鬼片咁搵替死鬼害人，我只係想搵人幫我翻案，我係被人害死㗎」

我話「害死？邊個害死你啊？大叔？」

大叔話「咪撚癲啦，我入嚟住果陣佢已經係到㗎啦」

我話「咁你姐係你屋企不嬲有鬼屌你啊，點解唔一早話我知」

大叔話「廢事講畀你聽嚇親你姐，再者我同佢住咗咁耐佢又冇搞我，都唔係啲惡鬼，怕咩呢」





女鬼插咀「啊，原來你個死仔一直扮睇我唔到枉我仲打算放棄同人溝通，以為一世都冇人幫到我翻案」

我話「其實點解你唔直接搵個凶手報仇啊？你哋鬼唔係識穿牆周圍走㗎咩」

女鬼話「邊有咁易啊，再者我好似畀某啲嘢限制咗我能力咁連離開呢個單位都唔得」

大叔捉住我，係我耳邊講「其實我宜家見唔到隻嘢，好似冇咗陰陽眼嘅能力，不過我勸你都唔好咁多事，佢哋好煩㗎，惹咗上身就好難甩身，你以後見到佢哋扮見唔到算啦」

我望住女鬼，佢眼泛淚光好似好慘咁，睇嚟佢死得好冤枉，我話「不如幫下佢啦，佢畀人殺咗又冇人知，人人都當佢係自殺咁，其實都好慘，凶手又逍遙法外.....」





大叔嘆咗一口氣話「你啲細路仔真係心軟，呢個世界好多呢啲嘢發生㗎啦，你顧得幾多個？咁好心做咩？」我話「你知佢畀人殺，又唔出聲唔幫佢，其實同幫凶都冇咩分別，一樣咁冷血，或者係你眼中我係個多管閑事嘅細路，但我過唔到自己果關，我唔可以扮視若無睹咁」

大叔話「隨便你啦，你要幫佢係你嘅事，出事我都唔會理，我都畀咗忠告你」大叔著番條孖煙囪，擺出一個唔在乎嘅樣，跟住行咗入廁所，睇嚟咩都唔想理，唉....佢真係個冷漠嘅大人