我次次拍拖都拍唔長，因為我……: 大叔篇
見到阿希紅都面晒咁望住我個肚腩，我都覺得有啲老尷，試圖講下廢話轉移下視線，我話「你中學畢業後有冇打算讀書？ive 果啲？」
阿希忽然停咗落黎冇咗灌啤酒，沉默咗幾秒，欲言又止咁，我話「你屋企都應該有能力供你讀書啊，點解唔番工唔讀書，屈係屋企...」阿希好似受到刺激大聲講咗句「唔好再講啦⋯⋯我係中學已經受夠被人欺凌白眼，本身連我嘅好朋友好兄弟都離開我背叛我」佢一路講一路流住眼淚，喊到好似個大細路咁
我拍拍佢膊頭，叫佢唔好太難過，佢接住繼續講「中六果年我鼓起勇氣同我鍾意嘅人表白，我知呢個係最後機會，唔表白就冇機會，所以我係考公開試前同咗阿謙表白...」我話「阿謙？男仔嚟㗎？
」佢話「係啊
我由中四開始暗戀佢，一直同佢都係好兄弟，佢有咩傷心唔開心都會同我講，眼見佢同過女仔拍拖又分手，為咗女女意志消沉，我都一路陪住佢安慰佢，迷迷咁支持佢」見佢喊到啲眼淚流到落下巴，我即刻攞咗卷紙巾畀佢，佢抹一抹眼淚繼續講「去到考公試前，我個心一直忐忑不安，根本冇心溫書，我決定將我嘅心意話畀佢知，我搵咗日放學同佢講，因為我哋好多時都一齊放學行番屋企，當佢聽到我表白後佢笑咗笑話咪玩啦，我話我認真㗎唔係玩，之後佢面色一沉，靜咗冇咗講嘢，仲話自己醒起要去超市買嘢，唔同我一齊行番屋企....」
我話「佢冇當面拒絕你？」佢話「冇啊，當時我心諗佢一時接受唔到姐，畀啲時間佢適應下，點知真正嘅惡夢就從此開始...」