我次次拍拖都拍唔長，因為我……: 阿希篇
話說抽住啲咁重嘅啤酒行三層樓都幾辛苦
不過都還好，可以沖番個凍水涼洗下身，不過唔知點解愈沖好似愈寒，硬係覺得好似有偷睇我沖涼咁，周身唔聚財，我周圍望下，但又唔見有人偷睇我，唉算數，快快手沖完涼出去睇下大叔點話說我出到去果陣，大叔都已經飲完第二罐啤酒，佢拍拍隔離個位，叫我陪佢坐，我都好識做，除咗買啤酒仲買咗啲零食，我開咗包薯片擺咗係我地中間，大叔一路食一路講「唉，中年失業，都唔知幾時先搵到工」我望住頹廢嘅佢，好似一條死魚咁攤係梳化到，坐到突咗個肚腩出嚟，果下覺得佢有啲似小熊維尼，有啲可愛，有種想伸手摸下佢個圓圓肚腩嘅衝動
大叔發現我望住佢個肚腩，講咗句「做咩？未見過肥仔波啊？」睇嚟我望得太明顯，畀佢發現咗
我即刻話「冇啊，冇望你，你諗多咗啦」我即刻扮隊啤酒，唔敢講嘢，怕講多錯多