我次次拍拖都拍唔長，因為我……: 阿希篇

實在太突然了

冇啦啦畀阿叔攬住，係都未驚完之際佢都急急忙走咗，之後家姐用住不屑嘅眼神望住我，大大咁聲咁話「果然係打機識啊，好基友....」

我即刻回擊話「咪傻啦，我先唔會搞基囉，頭先一定係有鬼，撞邪啊」雖然我果下係咁反搏話自己唔係基，但我畀大叔攬住果下的確覺得有種安全感，同覺得好溫暖，我咁大個仔第一次有呢種咁窩心嘅感覺，唔知大叔攬我果陣又係咩感覺呢？

話說畀佢攬住果下，我真係有種通電感，唔單止係好似戀愛嘅觸電感，我仲好似通咗電，見到晒成屋都係朋友仔

原來大叔果招通靈唔只係拖手先會令對方見到，擁抱果陣都會，我畀佢攬住果下見到大叔身後企咗成班人，有個細路有個阿叔，因為開咗燈後幾秒就畀大叔推開咗，所以我淨係見到一眼

屑，宜家我仲驚啊

成屋都係鬼，點撚算好啊

我膽戰心驚地同家姐講「其實頭先玩碟仙你應該都feel到屋企好多朋友仔㗎？係咪」

家姐話「我係聽到有啲怪聲嘅.....但實際又冇見到啲咩」

我話「其實呢....阿叔見到野....有陰陽眼，我叫佢嚟其實係想證明畀你睇，屋企唔係好妥」

我同家姐講講下嘢突然之間有人㩒門鐘，嚇咗嚇，原來係外賣到，我攞咗啲外賣擺咗係枱面，家姐突眼話「不如攞出公園到食囉？」

睇嚟家姐都信屋企有邪嘢，我點頭話好，我哋最尾抽咗啲外賣出公園到食，我哋坐咗係長櫈到，我果下先正式鬆一口氣，唔知係咪頭先見到屋企企滿晒朋友仔，係屋企覺得好抑壓

家姐攞起咗塊pizza畀我，自己又攞咗塊，一路食一路講「你話個大叔見到鬼嘅....佢見到屋企個情況點？佢哋咩樣？」

我如實同佢講「大叔話你買啲二手衫係死人衫嚟，所以附咗嘢，屋企有成六七隻鬼，仲要好似掛爐燒鴨咁，一隻隻勾住衣架掛晒係你床尾個衣櫃到...」

家姐聽完呆咗望住我話「有冇咁誇啊？

吹水咋.....成六七隻...個大叔鳩噏咋」

我話「真㗎，頭先我都見到啊

大叔佢可以透過身體接觸，例如拖手咁可以幫人開陰陽眼，聽落係有啲基，但我同佢攬住果下見到成屋都係鬼啊，屌那星勁得人驚」

家姐話「好啦，見你個樣淆晒底咁的確唔似講大話，屋企咁樣的確要搵人搞搞佢...一係我搵法科師傅嚟屋企睇下點」

我話「家姐你不如dum 晒啲衫佢啦.....好撚邪啊」

家姐不耐煩講咗句「扔晒啲衫我著咩啊，我八成衫都係二手架啦，咪話咗會搵師傅嚟囉，呢幾日就忍耐下啦」

我衝口而出講「點忍啊

宜家我屋企都唔敢番啦，一日最衰都係你啊，買埋啲死人衫搞到成屋都係鬼...」家姐還拖話「吓，一定係我惹番嚟架咩？有咩證據...講真啊我又唔係好feel到佢哋啊，我日日都番工都唔係長期係屋企，唔似你咁成件垃圾日日係屋企，你咁撚驚嘅哋唔撚好番屋企囉，搬囉」

屌，死八婆家姐又串鳩住晒