性交轉運打喪屍: （151）

講到彩數，仲記得喪屍圍城嗰陣，有段時間自己嘅運氣都唔錯，當無左喪屍，生活正常返之後，嗰啲運氣又無是啊。

至於其實嗰一道轉運符，我一路都有戴住，曾經試過俾啲錢揾人性交轉運，但都無乜效果咁。

或者係道符根本就無用。

「喂！咪發夢啦！有客呀！」店長好大聲鬧我。

我當堂醒一醒，回過神，為counter前嘅客人埋單計數。



咦？眼前呢個嚟買嘢嘅男人，似乎喺邊度見過？

「老婆，朱古力味啱唔啱呀？」個男人好甜蜜咁同身邊嘅女伴揀緊condom。

坦白講，個男人地中海無頭髮，外貌非常普通，相反個女人就四四正正，生得幾標誌。

估唔到一個咁普通嘅男人都溝到個靚女做老婆。

我一路望住個男人，諗緊究竟喺邊度見過，諗到入曬神。



「Hello先生，你未找錢呀？」個男人對我講。

「Sorry，唔知點解，我硬係覺得你有啲熟口面，應該係邊度見過你？」我一邊講一邊找錢。

「我老公成日上電視做訪問，你見過佢有幾出奇？」該男人身邊嘅女人答我。

「上電視？你係名人嚟架？」我問。

「Er…都唔算嘅。」



「好啦，唔好理佢，我地走啦。」之後個女人就拖走個男人。

後來，我真係喺電視見返嗰一個男人。

原來呢個男人係當初李氏家族研發到解藥嘅最關鍵人物。

佢個名叫袁華得。

電視主持人問佢：「係啦，你當時係點發現到解藥嘅秘方呢？」

袁華得用講笑嘅語氣回答：「實不相瞞，其實係另一個我話俾我聽。當時我同我太太遇到喪屍，突然間有一個自稱嚟自未來嘅我出現，佢同我一齊救左我太太，而且仲將製造解藥嘅要訣話左俾我聽。」

主持人笑一笑講：「哈哈，咁之後呢，嗰個來自未來嘅你去左邊？」

袁華得諗一諗：「無記錯嘅話，佢同一部機器一齊消失左。」



「機器？莫非係時光機？」

「哈，我諗係啦…」

時光機？呢條友似係「車大炮」，我聽到無癮，於是熄左電視，直接入房訓教。

呢一晚，我又再夢見一個女仔。

自從平安返嚟屋企以後，唔知點解，我周不時都會夢見一個女仔。

呢個女仔係我從來未見過，個樣幾可愛，皮膚白白淨淨咁，喺夢入面我會叫佢「Kappa」。

我夢見過同佢一齊睇星星，一齊訓埋同一張床，仲夢見過同佢一齊做愛。



喺夢入面我同佢嘅關係非常親密，除左有甜蜜嘅夢境，亦都有可怕嘅噩夢。

曾經我夢見過Kappa喺我面前俾人殺死，每一次發呢個夢，我都會即刻扎醒，然後發現眼角滲住眼水。

無論係好夢定係噩夢，總之一夢見呢個女仔，就會有種強烈嘅真實感，仿佛身臨其境一般。