性交轉運打喪屍: （135）

佢突然放開拳頭，一堆灰色嘅粉末撻埋嚟我塊面度。

仆佢個街！條友真係夠賤格，竟然將地下石屎碎片，捏成粉末嚟陰我！

我對眼揦到乜都睇唔到，對方趁機連續砌我幾拳。

得到強大力量嘅我，連抗打能力都提升左，中左幾拳都仍然企得穩，然換轉平時嘅我，應該一拳就冧低。

「左邊！」Kappa用聲音提示嗰班人攻擊嘅方向，等我知道點樣閃避，「上面！」



我一邊閃避一邊捽眼，當對眼朦朦朧朧，開始慢慢睇得返嘢嘅時候，準備想還擊時，突然兩個裝甲人分別鉗住我左右手，企喺正中間嘅Alpha就舉起槍對住我。

千鈞一髮間，我用手踭向後撞擊，嗰兩個捉住我嘅人心口食到應，立即鬆手並連續退後幾步。

「蕉！」綠色激光卻已射出。

今次反應時間遲左，雖則最後都係成功避開，但激光掠過我手臂，導致一個燒傷嘅傷口出現。

只不過呢點傷無阻我嘅反擊，Alpha嘅卑鄙之舉更激起心中嘅怒火。



我好似葉問咁瘋狂出拳，將對方身上全部裝甲都打到粉碎，連嗰支激光槍都打到攣左。

Alpha流曬鼻血，身上無裝甲保護，我扯住衣領稱佢起身：「肯投降未？」

「小心後面！」Kappa突然之間大嗌。

我即刻轉身，眼見身後兩個裝甲人揸住刀，飛撲過嚟想隊我。

於是，我不得不鬆開手，用最快嘅速度轉身閃避。



兩個裝甲人並無就此罷休，繼續揸住刀追擊。

我以退為進，一路退後，等到佢地再次撲上嚟，背脊出現左破綻，我就用閃電般速度出現喺佢地身後。

當敵人意識到我去左佢地後面嘅時候，我已經出左手。

我雙手合成一拳，先重擊其中一個人嘅背脊，跟住想再出手，打倒埋另一條友嘅時候，Alpha突然大嗌「停手」。

「再唔停手，我就殺左佢！」

聽到Alpha嚴正嘅警告，我停低手，慢慢擰轉身。

Alpha一手扯住Kappa嘅頭髮，一手用刀「杭」住佢條頸。

「喂，你想點？」



「哈哈哈哈哈！」Alpha仰天大笑，「哈哈哈！我果然無估錯，你地兩個真係有嘢！」

我想利用我嘅速度，衝過去從Alpha手上救走Kappa，但呢個時候對方卻警告：「唔好郁呀！你個身只要稍微郁少少，我就即刻喺佢條頸度𠝹落去！」

此話一出，我成個人凍左喺度，唔敢再亂郁。

「哈哈哈哈哈哈！」Alpha又大笑一輪，「其實你地係咩關係啫？你咁緊張佢，佢又咁緊張你，莫非上過床？扑過嘢？」

我無出聲回答，個腦淨係諗緊方法救Kappa。

「哈哈哈！唔出聲即係默認啦！既然係咁，就等你心痛下！」講完呢句，Alpha就喺Kappa膊頭狠狠𠝹一刀。

「停手！」



「咪郁呀！郁親嘅話，下一刀就喺呢度割落去。」Alpha將把刀擱喺Kappa頸上。