性交轉運打喪屍: （134）

俾我打飛嘅裝甲人直接暈左，另外兩個裝甲人呆左一秒，然後憤然向我開槍掃射。

「蕉蕉蕉蕉蕉！」

面對一道道致命嘅激光撲面而來，我用超乎常人嘅速度，一一避開。

「Boom！Boom！Boom！Boom！Boom！」

激光射唔中我，只射中四面墻以及靠墻堆疊嘅存倉貨物。



Kappa、楊過同阿得全都趴喺地下，避免俾激光射中。

「上！大家一齊上！」

呢個時候，喺樓上西裝鋪嘅Alpha帶住手下，喺個大箍窿跳落嚟，加入戰團。

七八個裝甲人一齊圍攻我，佢地唔用激光槍，選擇近身戰，分別用軍刀同拳頭攻擊我。

強大嘅力量繼續源源不斷咁湧出嚟，唔單止速度變得好快，連啲肌肉都不由自主咁越谷越大，感覺呢刻嘅自己仿佛超級撒亞人附身，進入左一個好強嘅形態。



前面兩個裝甲人，一個用左勾拳「fing」埋嚟，另一個就使出「旋風掃堂腿」踢我雙腳。

由於我被重重包圍，所以都無咩地方好走，索性就正面迎擊。

我睇通曬佢地全部動作，先跳起避過嗰一腳，隨即喺空中同樣使出左勾拳。

「啪！」我同嗰個裝甲人拳頭撞拳頭。

呢一拳嘅威力，打爆對方拳頭上嘅裝甲不得止，仲令到佢成個人向後跌低。



從半空落地之後，Alpha忽然從後襲擊，飛身跳起嚟一個膝撞。

好在我眼尾睄到佢，加上速度夠快，一瞬間就避開左，隨即我順勢起腳還擊，只不過對方反應亦都好快，立即踎低身避開左。

下一秒，又有四個裝甲人，揸住鋒利嘅軍刀，由四面八方衝埋嚟隊我。

我一拳一個，幾下就將佢地打到訓低。

「可惡！」Alpha見到自己嘅手下一個個冧低，深深感到不忿。

眼前已有六個裝甲人訓低，計埋Alpha就剩三個人仍然企得喺度。

「精嘅你地最好直接投降！」我對Alpha講。

「呵！」對方又係一聲冷笑，跟住照辦煮碗，衝埋嚟作勢想出拳窩埋嚟。



佢嘅速度好快，但我嘅速度更快。

我本來打算趁佢未埋到身，主動迎面去用更快嘅速度砌低佢，殊不知條友居然使出茅招。