性交轉運打喪屍: （127）

「家姐，你話嗰班究竟係咩人？會唔會真係未來人？」

「班人講到似層層咁，加上佢地啲武器咁先進，我諗係都唔出奇。」

「感覺嗰班人好似…真係想將我地置諸死地…」Shirley臉上流露出一絲擔憂。

「有家姐喺度，我唔會俾你有事嘅。」Sandy捉住Shirley隻手，安撫對方。

在旁嘅我無出聲，默默計緊，對上一次做愛係幾日之前嘅事。



「係啦，你又點睇？」Sandy問我。

「咩…咩點睇？」

「你覺得嗰班追殺我地嘅裝甲人，係咪真係從未來時光倒流返嚟？」Sandy再問。

關於呢個問題，我都好想知道答案，我都好想知，究竟Kappa係咪未來人？

假如真嘅話，咁佢所生存嘅未來，係咪一個無可樂、無性教育、無啤酒，幾乎乜都無嘅未來？



「喂？做咩呆左唔出聲？」Sandy喺我面前yap手，令我回過神來。

「Er…我都唔知，不過我有一樣嘢唔明。」

「咩嘢？」

「我地就假設Alpha佢地，的確係從未來返嚟揾解藥，但點解要將解藥帶返去未來，咁係唔係代表佢地身處嘅未來仍然充滿喪屍？再假設喪屍危機從來未解決過，一直延續到去佢地身處嘅未來，咁點解Alpha唔將解藥用喺2021，而係聲稱要拎返去未來？」

我一連做左好幾個假設，問左幾個問題，Sandy同Shirley聽完之後，不禁陷入沉思，因此都大家沉默左一陣。



「咁佢地話曬係未來人，一直生存喺未來，咁無理由留喺度用解藥，救我地呢啲現代人嘅。」Shirley嘗試分析。

「唔係，阿得同Alpha曾經見過面，Alpha仲劈過阿得一刀，呢件事發生喺現代，而且仲係無幾耐之前發生嘅，換句說話講，Alpha喺我地呢個年代已經出左世，兼已經幫緊乘哥做嘢，既然係咁，點解穿越返嚟揾到解藥後，條友唔係直接喺2021改變歷史，反而仲要返去未來？」

……

……

Sandy同Shirley消化緊我嘅說話，再次靜左無出聲。

過左一陣，Sandy就話：「唉算啦，好鬼複雜，都係唔諗啦，阿妹，不如我地揾下呢度，有無水、食物之類嘅嘢。」

「嗯，好呀。」

於是，佢地兩姊妹喺呢間裝修緊餐廳，四周圍摷下有無嘢食。



我坐喺一張放住紅酒杯同刀叉嘅餐檯前，托住個頭，繼續諗緊嗰啲問題。

日落西山，從窗外照射入內嘅陽光，逐漸變得微弱。

左諗右諗，諗爆頭都係得唔到答案，最後我選擇放棄唔再去諗。

若然要得到解答，或者只能當面問Alpha。

好快太陽收走最後一道餘暉，無左自然採光，又無電又無燈，室內變得黑媽媽一片。

慶幸Sandy佢地揾到幾支，燭光晚餐用嘅嗰啲蠟燭同埋打火機，點著左之後，勉強可以有限度咁用嚟照明。

除左蠟燭，佢地亦揾到兩支水同三罐可樂，仲有一罐曲奇。



眼前嘅可樂令我諗起Kappa，諗起佢第一次飲可樂嘅反應，諗起佢飲太多急尿個樣......

唔知依家嘅佢係生係死...

我好擔心，但係除左擔心同向上天祈禱之外，我乜都做唔到。

呢一刻，我覺得自己好垃圾、好無用，連自己在意嘅人都保護唔到，反過嚟仲要對方保護自己轉頭，我真係好廢…

事實上，由細到大我都係一條廢柴，無運氣、無專長、無本事，完全無一樣嘢做得好，如果唔係執左道轉運符，我諗自己早就被喪屍咬死。

「唉…」感懷身世，我不禁歎一口氣。

現夜已深，蠟燭差唔多都燒完，我地將幾張餐檯泊埋一齊，就咁以檯當床訓喺上面。

然而，我成晚都訓唔著，輾轉反則，腦入面不停就諗緊Kappa。



「唔好啊！」Shirley發噩夢，突然之間扎醒。

「做咩事呀你？」旁邊嘅Sandy都被驚醒。

「我發噩夢…夢見自己個頭...俾激光射爆左…」

「發夢啫，無事嘅無事嘅。」Sandy以擁抱安慰對方。

見到Shirley發噩夢，我唔敢合埋眼，因為驚自己都會發噩夢，會夢見到Kappa出事。

我擘大雙眼，結果始終敵唔過強烈嘅倦意，最後都係洽著左。

「BOOM！！！」



第二朝，天濛光，樓上傳出可怕嘅爆炸聲，將我地三個嘈醒。