性交轉運打喪屍: （121）

「…踎低起身…呼氣吸氣…」

一大早，楊過又喺度做晨操，Shirley喺隔籬一齊做。

平時多數都係得佢地兩個，而呢日多左Kappa陪佢地一齊做。

感覺Kappa慢慢融入我地呢個圈子，同大家嘅關係開始變得融洽。

我伸伸懶腰，起身揾樽礦泉水，浪下口洗個面。



「…咪發吽逗啦，以後食粥食飯睇呢鋪，我地要快過乘哥一步整個解藥出嚟，咁樣先可以同佢交易，快啲諗下有無其他辦法啦。」Sandy對阿得講。

「……」阿得無回應，愁眉苦臉咁望住面前，檯面一堆儀器同化學品。

Sandy繼續講：「不如學楊過話齋，你調校調校原本材料嘅份量，又或者不如抽Jojo啲血或者口水溝落去試下，我睇discovery channel嗰啲人俾毒蛇咬左，都係用毒蛇本身啲血清整出解毒劑。」

阿得唉一聲，依然無乜反應。

「喂！有無聽我講嘢架喂？」Sandy喺阿得面前yap手。



我飲啖水，行埋去問Sandy：「佢做咩又咁頹嘅？琴日明明好地地架？」

Sandy哄埋嚟，喺我耳邊細細聲答：「琴日『佢老婆』無報夢俾佢呀嘛，所以咪唔開心囉，不如你依家拉高件衫，俾佢開心下？」

「下？日光日白搞呢啲？唔好啦。」我表示抗拒。

阿得又歎一口氣，苦口苦面唱苦情歌：「遙遠的她…」

「停停停！」



我即刻stop佢，出聲安慰：「唔好咁頹啦，你老婆可能琴日見你搞左成日，覺得太攰先無揾你啫，我諗今日就會再報夢架啦？」

「真係？老婆今晚真係會揾我？」阿得即刻打返起精神。

「Er…梗係係啦…同埋我覺得，Sandy其實講得有啲道理，不如你拎Jojo啲口水溝落去，睇下得唔得？」

阿得搲頭，諗左幾秒：「理論上應該唔得，不過都一試無妨嘅。」

「係呀，試下啦，試下無妨架。」

跟住Sandy就對我講：「你條友都有啲計喎，咁樣就氹返阿得。」

「都係求其噏兩句啫…」

呢個時候，Kappa無端端行埋嚟拉我過去做晨操：「唔好傾啦，過嚟呢邊，同我地一齊做呢個。」



「啱啱訓醒，唔係好想郁喎。」

Kappa無理會，係要拉走我。

楊過示範一次動作教我做，我望一望，照做一次。

楊過見到我動作唔啱，捉住我教點做：「唔係咁唔係咁，你個身盡量唔好咁前，仲要踎低啲。」

雖然對方好認真咁教，但感覺都係怪怪咁。

「係啦，個屎忽再低啲。」

我就唔到道力，一時間踎得太低，導致失去平衡，成個人「鄧」落地下。



「你都係再睇我做一次。」楊過喺隔籬親自示範一次深蹲嘅動作。

突然之間，阿得突然大嗌：「仆街啦！大家睇住呀！小心呀！」

我同楊過不約而同擰轉面，見到綁住Jojo條繩鬆脫左，另外Jojo原本戴住嘅狗罩都無左。

最弊嘅係，佢向住我地呢邊跑緊過嚟。

楊過咁啱踎低左，個籮pat突左出嚟，Jojo認唔到主人，跳起一啖咬落去。

楊過擰唔切身，就咁俾隻狗咬左。

我第一秒呆左，第二秒捉住Jojo，用力拉走佢，並催促：「阿得！快啲拎返個罩過嚟！」

阿得拿拿臨，攞個罩，衝過嚟笠落Jojo個口度。



「哇…好痛…」楊過跪喺地下，摸住個pat，佢左邊pat pat好明顯有個帶血嘅咬痕。

我同阿得、兩姊妹都好慌張，唔知點算好，係得Kappa好冷靜咁用紗布同棉花幫，馬上為楊過嘅pat pat止血。

而我地呢刻最擔心嘅係楊過俾Jojo咬完，之後隨時會變喪屍…

「點解Jojo條繩會甩左，點解佢會無戴罩架？」我問阿得。

「咁…咁我要攞佢啲口水…就要除左佢個罩，同埋我頭先係猛條繩，拉隻狗過嚟，可能因為唔覺意鬆左條繩。」

楊過由跪變成趴喺地下，臉容扭曲，表情相當痛苦。

「弊啦弊啦，依家點算好？楊過係咪就嚟會變喪屍？」Shirley好騰雞。



「不如趁佢未變喪屍…我地不如…」Sandy暗示要先下手為強。

下一個瞬間，楊過喺地下暈低左，徹底失去左意識。

「佢…佢係咪死左？」Shirley口震震問。

Kappa踎低，探手摸楊過頸上嘅動脈：「無，佢仲有脈搏。」

「未死嘅話，即係好快會變喪屍？」Sandy開聲。

……

無人回答到，大家都係你眼望我眼，跟住擸定一啲架撐，做好準備對付隨時會變喪屍嘅楊過。

大約過左三十秒，楊過突然趌返起身。

大家嚇到連續彈開幾步。

我地打量一眼楊過，只見佢嘅皮膚無變得灰白，眼珠亦無反白，個樣好正常。

「你…係人定係喪屍？」阿得問。

楊過自己望下自己啲手手腳腳：「我諗我應該係人。」

人？即係話楊過俾Jojo咬完都無變喪屍？？？

阿得小心翼翼行過，上下上下仔細咁觀察楊過：「你真係…無變喪屍…莫非…莫非你就係...嗰一個自帶病毒抗體嘅人？」