性交轉運打喪屍: （117）

經過接近一日一夜嘅時間，阿得照住usb嘅資料同步驟，終於整出解藥。

而Jojo就係我地試藥嘅對象。

楊過捉住Jojo，擘大佢個口，跟手阿得將手上細樽嘅紅色液體，倒落去Jojo個口度。

三秒之後，Jojo反白嘅瞳孔，慢慢變返原本嘅黑色。

「咦？好似得得地wor。」



我呢句啱講出口，Jojo就吠出聲：「汪Raugh…汪Raugh…」

吠聲之中夾雜住類似喪屍嘅咆哮，吠多兩句後，對眼再次反白，又完全轉換返可怕嘅喪屍咆哮聲。

阿得搖搖頭：「唔得呀，就算係化學料、步驟等等都跟足曬，但都係無用，差緊一樣嘢就係差一樣嘢。」

佢所講嘅嗰樣嘢，就係自帶喪屍病毒抗體嘅人，體內所流嘅血。

「但頭先Jojo都有幾秒變返正常，或者會唔會唔需要嗰啲血，只要重新調校過配方，都有機會成功？」楊過問。



「唔洗諗，一定唔得。」阿得一口咬定。

我拎起裝住剩餘紅色液體嘅樽仔：「我記得嗰日喺城大實驗室，個鬼佬拎住過一細樽液體拍片，依家諗返起，嗰樽嘢可能就係製成品，但樽嘢好似唔係紅色…好似係…係…」

我努力回想，腦海中不斷尋找當日嘅記憶片段。

「無顏色，係透明嘅。」

「係呀係呀！我諗返起啦，樽嘢係無顏色透明架！咁有可能真正嘅解藥，望落就係啲透明嘅液體。」



我講完就問剛才開聲答話嘅Kappa：「係啦，點解你會知嘅？」

「Er…Um…」Kappa支支吾吾，唔太想回答。

我無逼佢答，因此無繼續追問落去。

呢個時候阿得就話：「知道係咩顏色其實無用，一日無嗰啲血，一日都整唔到出嚟…」

「咕—」講講下，阿得個肚餓到打鼓，「算啦，唔理呢啲住，我肚餓啊，有無嘢食？」

「好啦！雖然解藥未話真係整到，不過距離成功其實只係差少少，橫掂呢度有電又有煲，不如等今晚我親自落廚，整返餐好俾大家開心下！」楊過自薦嚟煮今晚嘅晚飯。

既然有人肯煮，有得翹埋手等食，我地梗係話好。

等待開飯期間，阿得又飲返罐啤酒抖下，Sandy同Shirley見Kappa好似好多日無沖涼，就帶佢去沖涼。



喺單位入面，大門口側跟有一間隱蔽嘅細房（呢個我入嚟嗰時都無為意到），聽講本來係用嚟擺啲無用嘅雜物。

Sandy佢地嚟到之後，將啲嘢丟走曬出走廊，然後喺呢一層嘅後樓梯位，拉左條防火喉入嚟，再通去間細房，將佢搖身一變，變成沖涼房。