性交轉運打喪屍: （114）

「阿得整緊解藥，Sandy兩姊妹就幫我照顧Jojo，就得我一個嚟揾嘢食同揾電池。」楊過答我。

「電池？」

「依家周圍都斷電，我地要自製發電機，提供電力俾阿得整解藥。」

「咁解藥研發成點？」我同Kappa異口同聲問。

楊過歎一口氣：「條友成日掛住飲酒，整下停下，完全唔上心，同埋最弊係，我地未揾到最重要嗰樣嘢。」



「你指嘅嗰樣嘢，係自帶病毒抗體嘅人，佢地身上啲血液？」

楊過點點頭：「嗯，無錯。」

被喪屍咬完都唔會變喪屍嘅人，唔知我咁有運，會唔會身上會有抗體？

問題係要試驗就要俾喪屍咬，好地地無理由咁傻仔主動俾喪屍咬架？萬一無抗體咁咪大獲？

楊過喺馬路揾幾架車，拆左車頭嘅汽車電池，然後帶我地去嗰一棟，我地揾左好耐都揾唔到嘅工廈。



原來棟嘢喺啲內街度，唔怪之得咁難揾。

行上二樓，嚟到一個單位門前。

「遙遠的她…不可以再歸家…」

未開門都已經聽到阿得喺入面高聲唱歌。

一開門就見到醉左嘅阿得訓喺門口。



正如楊過所講，阿得掛住飲酒，都無心機整解藥。

環顧四周，見到單位入面四周圍擺放一箱箱存貨，中央靠墻位放置左一張檯，檯面放一啲實驗室器具同化學物品，Jojo就綁喺檯腳，無得亂咁走。

至於其餘空曠嘅地方就有一啲乾糧同水，仲有一部類似係發電機嘅物體。

Sandy拎住一部notebook，插住線叉電，Shirley就搬弄單位內嗰啲箱，似乎喺度揾嘢。

佢地見到我，都覺得好出奇，表示估唔到我居然仲生勾勾，而我就向佢地介紹我身邊女仔Kappa。

我如實同佢地介紹Kappa係裝甲人，一聽見佢地都嚇左跳，之後Kappa都表現得幾友善，大家先放下戒心。

「部機叉好電啦，我開埋個file俾你睇。」Sandy拎住手提電腦，行過去阿得面前。

所得到回應只係：「唔睇呀…整到解藥又點...我老婆都唔會返嚟架啦...」



另一邊廂，Shirley喺堆箱入面揾到一樽化學嘢，又行過去問阿得：「你要揾嘅係咪呢樽呀？」

所得到嘅回應同以上一樣。

阿得徹徹底底沉溺喺喪妻之痛當中，根本無動力去整解藥，亦正如佢所講，最愛嘅人都唔喺度，香港變成點佢全不在乎。

但，問題係香港嘅命運，幾乎可以話掌握喺佢手中，我地全部人都旨意佢整到治療喪屍嘅解藥，等危機解除，咁大家先可以過返原來嘅生活。

為左令阿得振作，我地其他人包括Kappa都絞盡腦汁諗辦法。