性交轉運打喪屍: （109）

「Kappa，你有無受傷？」

對方無出聲，就眼甘甘望住我。

「點呀你？有無整親邊度？」我打量Kappa全身，睇下對方有無邊度受傷。

問左兩次，佢先回過神，答我：「無…我無事…」

同我一樣，佢全身都濕曬，除此之外，身上似乎的確無乜大礙。



「你隻手流血嘅？痛唔痛？」佢捉起我受傷嘅手掌，睇睇上面嘅傷口。

「無事嘅，啲皮擦損左啫。」我一邊一邊扶佢起身，「係啦，我地不如返埋邊避…」

「Raaauuuggghh——」

說話都未講完，就俾突然傳來嘅喪屍叫聲打斷左。

啱先隻紅眼喪屍撞爛樓上嘅窗跳落嚟，家下上面其他普通喪屍，唔知係咪有樣學樣，陸續喺嗰排窗嘅缺口度，由二樓跳到落嚟馬路。



我內心感歎：唉！班喪屍俾我地抖下得唔得？

Kappa則踏前一步，似係想迎擊。

但係，樓上Keep住都有喪屍跳落嚟，數目眾多，我就覺得太危險，因此主動拖起佢隻手，轉身逃跑：「咁多隻，打唔過架，走啦！」

Kappa聽我講，跟我走。

雖然啲雨細左，但路面仍然濕滑，我地跨出急促嘅步伐，每一步都濺起水花。



至於後面追趕我地嘅喪屍，踩落水氹度，發出密集嘅「噠噠噠」踩水聲。

我地兩個跑左一百米左右，碰見路上有部廢置嘅單車。

四個轆嘅我就唔識揸，而兩個轆嘅我揸得掂有餘。

我搬起單車，坐上去，並示意Kappa坐上嚟尾座：「坐上嚟，我車你！」

Kappa眨眨眼，觀察左幾秒架單車後，先坐上後座。

「扶住我，坐穩啲！」我捉緊手把，踩上腳踏。

Kappa「嗯」一聲回應，雙手扶住我條腰。

望望後面嘅喪屍，抖啖大氣，我就加速向前踩。



大班喪屍窮追猛打，我騎住單車喺路上左穿右插，繞大路再兜小路，總之用盡方法嚟擺脫佢地。

而路上充滿障礙，有堆疊嘅斷肢，亦有翻側嘅車輛。

因此，擺脫喪屍嘅同時，我都要顧及前面，要一一盡量繞過呢啲障礙。

而每當我遇到並繞過呢類障礙時，後座嘅Kappa都會情不自禁再攬實一啲。

「Raauugghhh…aughhh…ugh…...」

過左幾條街之後，身後喪屍嘅叫聲越嚟越細，慢慢細到完全聽唔到。

終於擺脫嗰班喪屍，我鬆一口氣，嚟到一條偏僻嘅橫街。



Kappa仍然攬住我條腰，而且隱約feel到佢塊面貼落到我嘅背脊。

其實雨已經停左，附近亦都安全，但我無急住停車，淨係放慢嚟踩。

感覺咁樣踩住單車，載住一個女仔，喺危機四伏嘅喪屍世界遊走，有種莫名嘅小浪漫。

「弊啦…個心好似跳得好快…」Kappa突然出聲。

「下？你話咩話？」

「我嘅心跳，跳得好快好快，睇嚟我地要快啲搞嘢。」

「搞嘢？咁突然？」我急剎停，擰轉面問。

Kappa掩住心口，一臉認真咁講：「係呀，個心真係跳得好快，唔信你摸下。」



講完佢捉住我手，本來想我去feel佢心跳，不過見到我手上嘅傷仲未止血，就話：「你隻手仲流緊血，不如我地揾個地方坐低，等我幫你包扎下。」

咁啱單車剎停嘅位置，隔籬就有間賣衫鋪。

泊好架車，望望周圍無喪屍，再打開門睇睇，確認裡面都安全，我同佢先放心行入去。

店內雖然凌亂，但無喪屍，仲有一張長梳化。

我地先揾啲乾淨布，抹抹個身，隨後坐埋去梳化度。

Kappa從褲袋拎出紗布同棉花，為我包紮。

對方好細心又好認真咁幫我處理傷口。



我靜靜咁望住佢呢個樣，個心情不自禁，怦怦，砰砰，加速跳動。

當包紮完，佢一抬頭，我地嘅視線就對上。

呢一下嘅對望，有種過電嘅感覺，比起頭先，我嘅心跳再跳得快左。

就咁對望左幾秒，對方開口問：「你個心跳得快唔快？」

我點點頭，吞一淡口水回答：「好快，你呢…」

……

佢無出聲，用行動代替回答，一啖就錫落嚟我個嘴度。