性交轉運打喪屍: （108）

佢與我大約只有兩隻手臂距離。

咁樣望去，隻喪屍真係成隻巨人咁，高我兩三頭不得止，手臂仲粗過我大髀，非常之得人驚。

趁佢未郁手，我瞄準佢個頭，掹雞開火。

可惜射歪左，再想開槍就時候，支槍已經無子彈。

此消彼長，我射唔死佢，咁對方就要還擊。



喪屍咆哮一聲，跨步踏前，作勢向我揮拳。

好彩嘅係，地下濕滑，導致佢冼腳企唔穩，繼而拳頭打歪左。

呢個時候，起返身嘅Kappa執起路上嘅鐵通，衝埋嚟從後毆落喪屍個背脊。

「啪！！！」

從呢下響亮嘅聲音判斷出，Kappa係用曬全力打落去。



無奈喪屍啲肌肉厚過鋼板，根本傷唔到佢半分，隨即仲轉身揮拳，又一次將Kappa打走到幾米外遠。

「喂！你無事呀嘛？」我關切問道。

「無…無事」

Kappa慢慢撐起身，身上嘅裝甲除左心口同左手，其他部分經已全部破爛碎裂。

「轟隆！」雷聲震耳。



隻仆街喪屍咁樣對Kappa，使我無名火起，執起嗰支鐵通後，跟手懷住怒火對敵人作出反擊。

喪屍嘅弱點係個頭，目前個問題係，對方比我高，想攻擊佢個頭，就要企上一個比佢更高嘅制高點。

環顧四周，路上有幾架傾倒嘅私家車，腦海因而閃出一個想法。

「鏘鏘！」我用鐵通敲打地面，引左喪屍過嚟。

「咚！咚！咚！」喪屍朝住我邁出沉重嘅步伐。

等到佢經過左路面一架傾側嘅汽車，我就用最快速度，兜路繞過去架車度。

未等敵人反應過嚟，我就先跳上車，取得制高點，隨之揸實鐵通，由高處跳起，從後向住喪屍個頭插落去。

本身個位置係夠我隊中佢個頭，只係無算到喪屍會突然行前，導致我只插中後頸，差少少先中個頭。



「Ah！！！」喪屍發出痛苦嘅叫聲，轉身揮動拳頭。

我地距離咁近，佢一出拳，基本上我係完全無得避。

慶幸地下咁啱有塊脫落嘅車門，我立即拎起當喺盾牌咁擋隔。

「嘭！」

連隨車門，我成個人彈飛到幾米遠。

佢力量之大，車門都打穿埋，如果唔係道門擋一擋，穿窿嘅地方就係我心口。

支鐵通插喺佢條頸度，令佢痛苦萬分。



隻嘢發左癲咁周圍破壞，先打爛電車指示牌，又打爛廢置嘅汽車，更再次埋去攻擊Kappa。

儘管隻手流左血，但我都忍住痛，慢慢支撐返起個人，一心諗住過去救Kappa。

下一秒，喪屍就雙手稱起Kappa，隨之狠狠咁將Kappa撻落墻上。

呢下撞擊，令Kappa全身嘅裝甲粉碎。

此刻嘅Kappa趴喺地下，神志有啲唔清，更無能力反擊。

眼見對方有危險，一起返身，我二話不說衝過去。

隻喪屍已經雙手緊握，並高高舉起，似想用拳頭了結Kappa。

千鈞一髮之際，我瞇埋眼飛撲過去，攬住Kappa。



「轟隆！！！」

一下超巨大嘅雷電聲，響徹整條街。

擋喺Kappa前面嘅我仍然緊閉雙眼。

過左幾秒，喪屍好似都無打落嚟，慢慢仲聞到一啲燶味。

睜開眼，向後一望，喪屍仆左落地下，仲變左「燒豬」，成個人燶左。

背脊上嘅鐵通，令我聯想起好耐之前，喺土瓜灣遇過嘅一隻，被招牌漏電電瓜嘅喪屍。

莫非就係剛才嗰下閃電擊擊中左隻嘢？