性交轉運打喪屍: （106）

Kappa一路捉緊我隻手，不斷用力扯我上去。

我亦緊緊咁捉住對方雙手，下半身不停踢腳，嘗試踢走嗰隻捉住我嘅喪屍手。

可惜，點擺脫極都擺脫唔到，反而又多左一隻手捉住我隻腳。

我俾佢地越扯越落，Kappa依然緊緊捉住我唔放手。

下一個moment，唔知係螺絲鬆左定生鏽，欄杆忽然間鬆脫，從橋上斷開左。



嗰班挨住欄杆嘅喪屍，一次過順勢跌曬落橋下。

嗰兩隻捉住我嘅喪屍當然都無法倖免，一齊跌埋落去。

「俾埋嗰隻手我！」

我按照Kappa既說話，遞高埋另一隻手。

佢捉住我兩隻手，一下用力拉我上去。



喺對方嘅協助下，終於成功上到嚟天橋頂。

今鋪真係多謝個欄杆，同埋多謝運氣再一次拯救我。

然而，運氣固然重要，但如果唔係Kappa一直拉住我唔放手，我諗我早就俾喪屍扯走左。

所以真正救我嘅其實係Kappa。

加埋呢次，對方救左我至少兩次，可能佢嘅出現都係運氣嘅一部分。



上到嚟天橋頂後，相信無喪屍會再騷擾到我地。

Kappa除左套甲，拎罐可樂出嚟慢慢歎。

坐喺隔籬嘅我望住對方講：「多謝頭先你一直拉住我唔放手。」

「哇，好靚呀…」Kappa抬頭仰視夜空，無留心聽我講嘢。

我順住佢嘅視線望上天，發出同樣嘅讚歎：「係…好靚…」

夜空之上，繁星璀璨,猶如一粒粒發光嘅寶石，閃爍住獨特嘅光芒。

美景使人陶醉，我暫時忘卻現狀嘅不堪，與Kappa靜靜咁欣賞呢片美麗嘅夜空。

「呼~~~」



微涼嘅風吹過，勾起了倦意，對住漫天星斗，我不知不覺就訓著。

呢一晚，我發左個夢。

夢見喪屍消失左，香港回復正常，我去買六合彩，連中二十期，變左大富豪。

然之後畫面一轉，我住大屋，請工人，養貓又養狗，兼且開左間餐廳。

餐廳得一個員工，就係我之前嘅光頭道士老細。

我將啲嘢俾曬佢做，對佢呼呼喝喝。

過左無幾耐，有個女仔行入嚟拖住我手，話同我一齊去睇戲。



第一時間睇唔清女仔個樣，只見佢身穿白色長裙，長髮飄逸，身上散發陣香味。

直到我拖住佢手，開開心心行出鋪頭時，當佢嗌我個名，我擰轉面，先睇清佢個樣。

Ka…Ka…Kappa？

我夢中嘅情人，居然係佢？

「嘩啦—嘩啦—」

突然天空落大雨，下一秒，我扎醒左。

睜開眼，天色已光，天空灰灰蒙蒙，仲有雨水滴落。

「起身啦！落雨啦！」Kappa著返套裝甲，用手擋雨。



「滴噠滴噠—」雨點越落越密。

我成個人俾雨淋到醒曬，連懶腰唔洗伸，拿拿臨就起身，同Kappa揾路返落去避雨。