性交轉運打喪屍: （105）

喺附近行左一陣，搵到間阿信屋。

店內黑媽媽，貨架上大部分食物都已被清空。

左揾右揾，好唔容易先搵到幾包公仔麵，啲麵碎曬又無滾水淥，但醫肚要緊，唯有當係媽咪麵，乾爭爭都直接啪落口。

至於Kappa淨係關心有無可樂，搵左好耐先俾佢搵到一罐，亦係鋪頭剩低嘅唯一一罐可樂。

佢將可樂珍而重之咁收落件甲度，好似細路拎住心愛嘅玩具咁開心。



本來我地有打算今晚直接喺度留宿，無奈舖頭道門壞左，閂極都閂唔埋，再加上擔心紅眼喪屍仍然於附近徘徊，因此選擇另覓地方暫避。

剛踏出門外，幾十對反白嘅眼睛遍佈四周，殺氣騰騰。

驟眼之下，至少有二十隻喪屍包圍住我地。

敵眾我寡，不宜久留，我同Kappa一齊調頭跑返入舖頭。

「Raaauuuggghhh—」



嗰二十幾隻喪屍當然唔會就咁放過我地，成班就好似每朝金鐘地鐵站，行去轉車嗰班打工仔，發曬癲咁搶閘湧入嚟。

我地兩個從前門跑到後門，再從後門跑出出面。

呢次已經唔知係第幾次咁樣俾喪屍追，對於呢種時時膽戰心驚、疲於奔命嘅日子，我開始感到厭倦。

究竟呢一切幾時先會結束，好想快啲過返啲正常人嘅生活…

「哎呀！」



我地行上天橋，Kappa突然停低，我收唔住腳，個頭撼左落去套甲度。

而對方之所以停低，係因為前面又一大班喪屍擋住去路。

又係呢啲前後俾圍堵嘅情況，又係唔知遇過幾多次。

呢一次對比起之前，唔同嘅係我地喺行人天橋度，得前後兩條路，左右兩邊根本無位可走。

眼見除左從天橋跳落去，似乎無第三條路。

呢度雖然都有兩三層樓高，但家下我有運氣加持，應該唔太驚。

估計跳落去就會好似啲電影橋段咁，無端端有架貨van經過，跟住我地一定係跌落去裝住床褥嘅車斗，從而成功逃脫又無事都無。

嗯！無錯！我相信劇本一定係咁寫！



於是，滿懷希望同信心嘅我抓住Kappa，想拉佢一齊跳落去，殊不知對方卻叫停：「做咩呀？」

「無路走啦，我地跳落去啦。」

殊不知我一講完，Kappa就踩上欄杆：「我地爬上個頂咪得囉。」

係喎！擒上去天橋頂咪得囉！

Kappa身手敏捷，兩下就爬左上天橋頂。

橋兩邊嘅喪屍殺到埋身，我呼吸一口氣，學Kappa咁跳上欄杆。

當我想趴上頂嘅時候，突然俾隻喪屍扯住隻腳。



一下子我失去平衡，捉唔實個壆，差啲就要跌落去。

好彩！好彩Kappa及時掹住我隻手，捉實我唔俾我跌落去。

隻喪屍死捉住我隻腳唔放，而且仲feel其他嗰啲手都想扯埋一份。