性交轉運打喪屍: （82）

「叩叩！」

「阿妹，你喺唔喺度？」Sandy輕輕敲門。

「嗯？家姐你揾我呀？」Shirley回應。

「係呀，開飯啦，快啲出嚟食飯啦。」

「嗯，好呀！」



捉完大富翁，同Shirley搞左兩次，咁樣就用左一日時間。

呢種生活好似仲過得好過之前每日喺道堂，俾個光頭臭道士勞役嘅日子，問題只係唔知可以維持到幾耐。

Shirley清理完，著返衫褲就返出大廳。

我等左一陣先出去，費事俾其他人見到我地一齊。

喺廳，楊過佢地五人，圍埋喺茶几度打緊邊爐。



「出嚟啦？快過嚟開餐啦！」楊過喺個滾起嘅煲入面，夾起一舊雞肉。

今餐好似好豐富，我流曬口水。

阿得隔籬有空位，我慢慢行過去。

「Raugh！」

忽然間，Jojo突個頭出嚟攔路，仲要個口無笠狗罩，擘大口露曬尖利嘅牙出嚟。



我當堂嚇一跳，退後兩步：「做咩...做咩楊過你隻狗無笠罩嘅…咁好危險…隨時會咬人架喎…」

「定啦，我幫佢綁左條繩，佢唔會周圍走亂咬人，只會喺嗰個位附近活動。」講完楊過就拋舊生肉到Jojo面前。

Jojo聞左兩下，似乎對舊肉無興趣，然後岳高頭對住我叫。

睇個款都係鐘意人肉多啲，如果唔係有條繩綁住，佢應該已經撲過嚟噬我。

我避之則吉，繞過隻狗，急急腳坐去阿得隔籬。

「喂，你唔好成日掛住飲酒，整舊牛肉食下啦。」楊過主動夾塊肥牛俾阿得。

阿得望住舊牛肉，又眼泛淚光：「我老婆生前都好鐘意食牛肉架，次次打邊爐我都會特登落九龍城買手切牛肉，諗返起嗰啲日子，真係…」

阿得講唔落去，眼濕濕咁大啖飲酒，我地其他五人靜左，唔知講乜好。



見氣氛有啲尷尬，於是我求其開個話題，分散一下阿得嘅注意力，等佢唔好成日提佢老婆。

「係啦阿得，之前你咪同我提過，乘哥捉過你去研發喪屍解藥嘅，不如同大家分享下？」

「咩話？乘哥揾過你研發解藥，乜原來你咁猛料架？」楊過露出意想不到嘅表情。

其餘嘅三個女仔都投向好奇嘅眼神，Isabel仲話：「哇！真係睇唔出，乜你咁勁架？」

「唓！勁條毛咩，我呢啲小薯仔，俾人捉返去咪又係幫唔到手。」

「所以你之前係做研發藥物之類嘅工作？」Sandy咬住蟹柳問。

「掹車邊都算係嘅。」



「照你嘅講法，即係話乘哥揾左批科學家一齊去研發解藥？」楊過問。

阿得點點頭，又飲一啖酒：「無錯，唔單止係我做嗰間藥廠，聽講只要係佢有份投資或資助過嘅藥廠，乘哥都有派人去捉，就連三大嘅教授都唔放過。我諗如果唔係人手唔夠，另外五間大學嘅教授都會被捉走。」

「既然係咁，望就望乘哥揾嘅嗰啲人，可以盡快研發到解藥啦！」楊過眼中閃爍住期盼。