性交轉運打喪屍: （59）

路上都無遇見喪屍，反而地下就多左好多，個頭爛開曬嘅屍體。

前路咁暢順，好快返到出去，然後再沿住頭先落嚟嘅嗰條樓梯返上去。

消耗左咁多體力，流左咁多汗，個口非常乾燥。

好彩行行下，又會俾我喺地下執到個十蚊銀。

拎住個硬幣，埋去自動售賣機度，買左支寶礦力，解解口渴。



四周圍非常安靜，聽唔到半點喪屍嘅叫聲。

我一邊飲住寶礦力，一邊行出大堂。

大堂無喪屍，十分平靜。

然而，呢份平靜並無維持太耐。

大概五分鐘後，腳邊感覺到有啲震動，隨之而嚟嘅係密集腳步聲。



我順住啲聲，望去圖書館嘅入口。

有兩個人衝出嚟，後面跟住成堆喪屍。

呢兩條友正正就係戴帽男，仲有開槍射過我嘅背囊友。

我頂呀！呢兩條仆街居然仲生勾勾，生存到依家都未死？！

兩條友迎面對住我，臉上露出驚訝嘅表情，好明顯係驚訝緊點解我仲未死。



我睄到佢地手上嘅手槍，好驚又案件重演，因此二話不說，轉身跑上扶手電梯。

好死唔死，嗰兩條爛坦又跟埋上嚟，引埋一班喪屍。

呢個時候，我唔理得咁多，從電梯上到樓上，一路唔停咁搏命跑。

好彩飲左寶礦力，補充返少少體力，先俾我有氣力繼續跑。

穿過藍區，再過黃區，後面嗰兩條仆街仍然追貼住我，喺佢地後面仲有一堆喪屍。

跑到盡頭，又見返第一次入嚟嗰陣嘅紅色大門。

今次我無推門出去，反卻轉上通往五樓嘅樓梯。

長樓梯通往嘅地方，無睇錯嘅話，呢層似係大學飯堂。



一眼快速掃視過去，個場好大，啲喪屍疏落咁散落於各個位置。

有啲喺收銀櫃後面，有啲喺餐牌指示板前，有啲就喺遠處嘅座位邊。

「踏踏…」

唉！頂！我係咪前世欠左嗰兩條死宅男，做咩係都要跟埋過嚟？

以免驚動飯堂嘅喪屍，我放輕手腳，彎低身行去，匿埋喺canteen內，接近門口嘅一張飯檯檯底。

心裡希望藉此擺脫嗰兩條友，以及其身後嘅喪屍。

我趴落地下，慢慢挪動身軀，盡量隱藏自己。



挪到中途，唔小心撞到啲嘢。

準確啲講，唔係一啲嘢，而係一個人。

有個女仔趴喺我隔籬，而且有啲面善。

「Shh—」個女仔見到我，即刻用手勢示意我唔好出聲。

諗左陣先記返起，眼前呢個女仔我睇相見過，佢就係Sandy個妹。