性交轉運打喪屍: （57）

「NO！！！！！」

喺接近門口嗰邊，突然傳嚟鬼佬一聲大嗌。

離遠望見，個鬼仔俾三隻喪屍擒住嚟咬。

「Fuck！！！Fuck！！！Fuck！！！」

個鬼佬本來俾另一隻喪屍捉住郁唔到，但眼白白睇住個細路，活生生被咬甩個頭，嬲到爆發全身嘅力，擺脫左隻喪屍。



之後，佢拎起檯面一細樽紅色粉末溝落一細樽白色粉末，再引四隻喪屍埋身。

喪屍一過嚟，佢就向後退後一大步，同時用力將成樽嘢揼落四隻喪屍面前。

「Boom！！！！！」

當堂地上一下爆炸，火光紅紅，煙霧四散。

我嚇到呆左，o曬嘴。



而就係一下分心，我被附近隻喪屍捉住隻腳，仲被用力扯落嚟。

我從檯面仆落地下，撼親個背脊，痛到飛起。

隻喪屍捉住我隻腳，我要用另一隻腳不停咁踢，先踢得走佢隻手。

跟住我喺地下見到一舊灰銀色金屬，於是擸起佢，再企返身，諗住大大力用舊金屬，扑爆喪屍個死人頭。

結果萬萬估唔到，嗰舊金屬脆過薯片，一扑落去就碎曬。



「Raaauuughhhh—」

隻喪屍張開口咬過嚟，我即時將手上嗰啲碎開嘅金屬，塞入對方個口，並轉身逃跑。

跑無兩步就唔小心，踩到剛才被掃落地嘅鐵鉗，導致冼左落地下。

喪屍追到上前，我嚟唔切起返身，唯有喺地下趴。

趴下趴下，趴到死角，再都無路可走。

仆街啦，今次無啦，走又走唔到，想反抗又無武器，面前嘅喪屍只要一撲埋嚟，咁我就即刻收皮。

我心感絕望，望住個天花板，祈求可以再冧多次，同時眼尾睄到一直收埋喺褲袋嘅水槍，跌左出嚟。

之前我多番靠運避過一劫，心諗話唔定今次都可以好彩用水槍冼低喪屍。



因此我執起水槍，可惜未瞄準到，喪屍已經向前傾，擘大口要咬落嚟。

我驚到瞇埋眼，雖則知道想靠水槍冼低喪屍已經嚟唔切，但都神經反射式按實水槍發射。

天啊！

真係諗都唔諗到，不可思議嘅事情再次降臨！

水槍嘅水射左入喪屍個口，隨即喪屍口腔著曬火，然後仲犀利到炸開埋。

……

……



我呆左接近五秒，個腦完全理解唔到發生左咩事。

點解啲水入左佢個口會無端端著火爆炸？究竟係咩原理？

唔通水槍入面係火水？但火水無火都唔會燒架？

我諗左一陣都係諗唔通，起返身之後，行去接近門口嘅位置，睇下個鬼佬情況如何。

剛才鬼佬製造嘅嗰下爆炸，威力非常大，一次過炸死曬四隻喪屍。

當其時，儘管喺爆炸嗰陣，佢本人退後左一大步，但都無法完全避開，結果連自己都炸傷埋。

鬼佬奄奄一息咁訓喺地下，塊臉同心口都明顯嚴重燒傷。

「He…here’s…a…antidote…please take…take it…」 個鬼佬喺褲袋拎出一隻usb手指，震住咁遞高隻手俾我。



我一時間都未反應過嚟，諗緊對方講緊咩嘢。

Here、please、take it呢啲簡單嘅詞語我聽得明，但咩係「anti刀」？

佢俾隻usb我，莫非「anti刀」係usb嘅英文全稱？

「It cures…cures my kid…so please…take…take it and…and…」鬼佬氣息越嚟越弱，已經開始講唔到嘢。

我唔知隻usb咩來頭，但佢係咁叫我take it，咁我都順佢意拎到手上，並放入褲袋。

另外喺頭先嗰句我聽到佢話「kid」，即係兒子咁解，無理解錯嘅話，嗰個細路應該就係佢個仔。

睇嚟佢應該係想臨死前，見個仔最後一面。



我想行去隔籬，喺地下執起佢個仔被咬甩左嘅頭，可惜未嚟得切，對方已斷氣身亡。

個鬼佬話曬放我入嚟，算係救過我一命，見到佢咁樣死左，我個心都好唔舒服。

本以為呢刻危機已經解除，點知過左一陣，又聽到喪屍叫。

頭先嗰隻「kick」住喺通風櫥嘅喪屍，唔知幾時掙脫左出嚟，又試喺實驗室周圍走。

呢度都係不適宜繼續逗留，都係離開為妙。