性交轉運打喪屍: （56）

實驗室除左有鬼佬之外，仲有一個年約十歲嘅外國細路。

細路衣衫破爛，個嘴同埋條頸都有血跡，手上舉住一部iPhone。

至於實驗室嘅環境，望落去感覺同一般嘅化學實驗室差唔多。

一排排嘅黑色長檯，每張檯上擺放住各種嘅實驗室工具，例如係燒杯、量筒等其他我講唔出名嘅東西。

除此亦有一啲化學物品放置於檯面，另外，實驗室墻邊位就有幾部類似櫥櫃嘅白色儀器。



入到嚟，我拍拍心口，先定一定驚，然後用英文同鬼佬講多謝：「Thank…Thank you…」

「Shh—」個鬼佬做出「噓」嘅手勢，示意我唔好出聲。

跟住，佢坐到長檯邊嘅櫈上，喺檯面拎起一細樽透明液體，對住細路手上嘅iPhone，嘰哩咕嚕講一堆我聽唔明嘅英文。

個鬼佬望落至少五十歲，臉上戴住護目鏡，身穿白色長袍，衣著同出面嗰班喪屍相若，我估佢地應該都係呢間學校嘅教授同學生。

就咁睇，佢兩個似乎係喺度錄緊一啲嘢，至於內容係咩，我就真心聽唔明。



「砰！！！」

霎時間，一下沉重嘅拍門聲響徹整間實驗室。

回頭一望…

弊傢伙！出面班喪屍喺想撞門入嚟。

我心諗，你班喪屍俾人抖下得唔得呀？！



「Step back！」個鬼佬馬上叫個細路退後，跟手搬啲檯櫈頂住門口。

我亦無袖手旁觀，埋去幫對方手。

「砰！！！」

班喪屍兩下就打爆左門上中間塊透明玻璃，隨之有七八隻手伸左入嚟。

我同個鬼佬面紅耳赤，出盡力頂實道門。

「砰！！！」

外面堆喪屍起勢又撞又推，門鎖已經關唔實，門嚹越嚟越大。

「Watch out！」個細路驚恐大叫。



「Don’t worry！ I'll handle it！」個鬼佬出恆力，頭上青筋都爆埋。

我地博曬老命咁向前推，無奈敵眾我寡，頂左幾分鐘最終頂都係頂唔住，俾班喪屍湧左入嚟。

個鬼佬第一時間回後保護個細路，我都立即往後跑。

合共七隻喪屍入左嚟，四隻同鬼佬佢地纏上左。

另外三隻就猛咁追住我，而且追得好貼。

其中一隻跑跑下，竟然飛埋嚟撲向我。

幸得我及時閃避，隻喪屍撲唔到我，反而撲落張檯度，個頭撞爆左檯面一樽透明液體。



嗰啲液體飛濺出嚟，「乸」到佢個頭爛曬。

照咁睇個樽裝住嘅，應該係啲腐蝕性液體。

依家得返兩隻喪屍，我跑到實驗室嘅盡頭，無路再走。

「Raaauuughhhh！」

兩隻喪屍左右夾攻，後面無位走，前面又有張檯擋住。

眼見佢地作勢想一齊衝埋嚟，情急之下，我唯有跳上張檯度躲避。

對方捉唔到我，雙雙攬埋一齊，然而佢地並無就此罷休。

佢地順住我跳上張檯傳出嘅腳踏聲，伸手過嚟捉我。



我左跳右彈，不停避開嗰四隻手。

兩隻喪屍捉唔到我，淨係不斷掃走檯面上嘅實驗室工具同化學品。

我唔想淨係挨打，因此一邊閃避，一邊睇準時機。

見到其中一隻喪屍縮手，我就對準佢個頭，一腳踢落去。

隻喪屍食到正一正，一下子連續退後左五六步，直接撞埋去嗰啲類似櫥櫃嘅白色儀器度，兼且成個人向後拗左入中間個間空位。

同一時間，嗰個位置上面塊玻璃，垂直「dum」左落嚟，壓住左喪屍個心口，導致隻喪屍上本身「kick」住左，翻唔到出嚟。

喺呢個moment，我腦袋模糊地諗返起，以前化學堂阿sir講解過呢種白色儀器嘅名稱，好似係叫通風櫥還是煙櫥？