性交轉運打喪屍: （45）

 
「喂睇下！有差佬啊！有救啦！」Isabel指住前面。

喺超市門外，咁啱遇到一班著軍裝嘅差佬。

對面五個人，有男有女，制服上血跡斑斑，每個人身上都托住手槍。

「差人叔叔，你地要保護我地呀。」Isabel想行過去差佬面前求救。

點不知佢剛踏出一步，其中一個戴眼鏡嘅差佬，突然向天鳴槍。



當堂嚇到我地面都青，且下意識舉高雙手，並連續退後幾步。

個四眼差佬用嚴肅嘅口吻，警告我地：「呢間超市唔歡迎你地，即刻躝！」

我頂佢個肺！呢班人居然想獨霸曬成間超市嘅水同食物！？

「聽唔聽到呀？躝呀！」四眼差佬個樣極度猙獰。

我地手上都係得把刀，鬥唔過佢地支槍，因此只能舉高手，慢慢退後。



然後，班死差佬招招積積咁「超」我地一眼，慢條斯理行入超市。

就喺佢地踏入超市門口嘅一瞬間，突然間從超市裡面，有一大堆喪屍湧出嚟門口。

密密麻麻嘅喪屍好似螞蟻嬲蜜糖咁，撲埋去班差佬度，堆埋一舊又咬又噬。

正所謂蟻多嬲死象，儘管有槍都好，對住咁大班喪屍，班差佬都係無法反擊，最後淹沒喺喪屍堆之中，成為喪屍嘅食物。

至於我呢刻心裡大感慶幸，如果班差佬無出嚟阻頭阻勢，咁頭先行入超市嘅就係我同Isabel，繼而俾成堆喪屍湧出嚟，擒住嚟咬嘅都會係我地。



咁都逃過一劫，哇，真係好彩！

呢排我係咪行運？成日都咁好彩死唔去嘅？有啲好運到我自己都唔敢相信。

然而此地不宜久留，我地兩個拿拿臨閃人，快快脆離開現場。

去唔到超市揾嘢食，唯有揾下其他鋪頭，睇下有無水或者食物。

之後一路上都無再遇到喪屍，又飢又餓嘅我地精神開始散渙，開始有啲鬆懈。

行下行下，經過一檔果欄門前時，前面忽然出現一班喪屍攔路。

我地隨即調頭，結果後面又有一班喪屍。



前後都俾喪屍夾擊，今鋪瀨嘢啦，想走都無得走。

「死啦死啦，點算呀，無路走呀！」Isabel匿喺我後面，神情驚恐。

「仲有得點算？一係同佢地死過，一係就等死。」我揸實手上嘅菜刀，心情非常淆底。

「下…咁多隻喪屍…點打得贏呀…」

「哇！蟲呀！」講講下嘢，Isabel突然大嗌，仲用力推左我出去。

我一踏前，左腳就踩到西瓜皮，然後成個人滑左出去，不受控咁向住前面，嗰五六隻喪屍衝埋去。

我心諗，今次仆街啦…

我單腳踩住塊西瓜皮，瞇埋眼，胡亂揮動手上嘅菜刀，作最後垂死嘅掙扎。



大概踩住西瓜皮滑行左二十米，慢慢停低後，發現自己都未死得。

睜返開雙眼，回頭一望，見到嗰五六隻喪屍全部無左個頭。

天呀！簡直係不可思議！頭先我亂咁舞把刀，居然每一下都精準咁，劈中每隻喪屍個頭。

哇！直頭稱得上係奇績！

「喂！仲企喺度做咩！後面啲喪屍追到啦！」

擋路嘅喪屍被清除後，Isabel一支箭向前跑。

的而且確，呢個唔係慨歎嘅時候，我趕上對方嘅腳步，迅速逃跑。