性交轉運打喪屍: （41）

 
「眼甘甘望咩呀？死鹹濕佬！」Isabel怒睥我。

我隻手偷偷地掩住褲浪，喺度扮無嘢望去第二度：「無，我見你揾啲咁嘅衫著，覺得好奇望兩眼啫。」

「嗰間鋪頭啲衫都唔好睇，得呢啲返工衫著得下。」

佢答完又繼續講：「仲有呀，你唔好扮嘢啦，我知你諗咩架！剛才我俾個阿差搞，親耳聽到你條友話想join架！死鹹濕佬！」

「下…Er…你誤會啦…」 我嘗試揾藉口辯解，「我把口係話想加入，但實際其實我係想借啲意，接近條友，然後揾機會救你。」



「呢啲藉口你估我會信，你當我三歲細路仔呀？警告你呀，今晚唔好訓過嚟，否則我唔客氣打你架！Understand？」

我心諗，本身今晚都無想過要做啲咩，但聽完佢咁講，我就即刻好想「un」到佢收聲。

「講左咁耐，個口有啲乾添，我揾啲水飲下先。」我起返身，諗住行開下，順便去貨架揾水飲。

點知呢，我揾勻曬都唔見一支水，於是即刻問Isabel：「點解啲水無曬架？你唔好話俾我聽，你頭先沖涼用曬下話？」

「下？無曬咩？我都唔知喎。」



「你嚟自己揾下，真係一支水都無。」

Isabel埋去啲貨架𥄫左𥄫 ：「Er…好似…又真係無曬…」

「咩好似？直頭係無曬！」我嬲嬲地，忍唔住鬧佢，「你有無搞錯！啲水拎嚟飲架，有咩理由用曬嚟抹身沖涼！你話依家無水飲點算好？」

「無水飲咪飲酒囉。」Isabel喺貨架攞左支日本梅酒落嚟，「飲梅酒啦，酸酸甜甜仲好飲啦。」

基本上全間鋪連埋個倉庫，飲得嘅嘢就得返啲酒。



我之前都講過，我本身係唔太好飲酒，於是我再成間鋪揾多次，最後好好彩揾到一罐，應該係唯一一罐咖啡，勉強叫做可以俾我止頸渴。

Isabel坐喺鋪滿毛巾嘅地下，拎住樽梅酒喺度飲，見我想準備坐低，又同我講：「嗰邊收銀好似有部收音機，你拎過嚟一齊聽下。」

條友真係當正我阿四，但我同自己講，我係男人我有氣度，唔同呢啲女人計較。

我拎到部收音機，返去坐低再扭開。

「沙…沙沙沙…」

我淨係擰到沙沙聲：「都無嘢聽嘅。」

Isabel飲一啖梅酒，攞部機過去，擰左一陣，結果佢擰到去有人聲。



「…專家相信，嗰班周圍咬人嘅施暴者，係感染左一種新型病毒，呢種病毒感染力極強，而且受感染者會精神錯亂，行為失控，並出現危險暴力行為。」

收音機播放緊一段相信係政府發放嘅消息。

「...現階段政府已經全力支援全港所有微生物學家，希望可以盡快製造出解藥，嚟治療感染左呢種新型病毒嘅患者…」

果然不出我所料，嗰班人真係中左喪屍病毒，因此而變成喪屍。

話就話係積極研發緊解藥，但研發到嘅可能性有幾大，呢層真係話唔埋。

萬一永遠都研發唔到，咁咪即係世界末日？

朋友、屋企人都死曬，世界末日就得返自己一個死剩種，自生自滅...

「另一則消息，政府喺銅鑼灣維多利亞公園，設置左大型救護站，政府在此勸籲，港九新界嘅生還者如需協助，可前往該地。」



呢條消息，好似Isabel有提過，咁係咪代表只要去到維園就會安全？

「係啦，你之前係咪講過，你同Jason嗰陣係諗住去維園？」我問Isabel。

「嗯…唔好嘈啦…好暈呀…」Isabel塊臉紅卜卜，個樣迷迷糊糊咁。

唔講都唔知，條友飲下飲下，原來隊曬成樽梅酒。

照佢依家呢個樣，睇嚟係飲醉左。