性交轉運打喪屍: （39）

棚架搖搖欲墜，感覺隨時都會跌落嚟。

此車不宜久留，所以我同Isabel快速行落車。

啱先揸車亂咁嚟，完全無睇路，都唔自己揸去邊，家陣落車望望周圍。

寶其利街、寶石戲院、新忠記打冷…

原來呢度係紅磡。



四周圍一片骯髒凌亂，屍體血漿遍地，不見人影亦不見喪屍，只有隱約聽見喺四方八面傳嚟嘅低沉喪屍叫聲。

現在已經係傍晚時分，個天都黑得七七八八。

喺昏暗嘅環境下，嗰啲喪屍咆哮顯得格外陰森。

「——砰！」

個建築棚架真係冧左落嚟，砸中成架車。



好彩走得快，否則肯定會砸到變柿餅。

「Boom！！」法拉利就俾棚架砸爆，真係爆炸嗰隻爆。

發出超巨大聲響，迸發熊熊火光。

「Raauughhhhhh！」

呢下爆炸聲似乎激起左附近喪屍嘅注意，本來微弱而低沉嘅叫聲，頓時變得高昂。



儘管暫時都淨係只聞其聲，但係就快到夜晚，路邊啲街燈壞壞地，閃下閃下咁。

個天就嚟黑齊，周圍光線唔充足，無法睇清環境，再者手上又無武器，就咁喺條街，一定會好危險。

照咁睇，我地最好就係趁徹底入黑前，盡快揾個安全地方躲避。

我諗住將個想法同Isabel講，殊不知擰轉面卻唔見人。

環顧四周，先發現對方靜雞雞，喺路邊爆開嘅消防喉旁沖洗，難怪頭先都一直聽唔到佢把港女聲。

「Isabel，唔好洗住啦，陣間入夜條街好危險，拿拿臨去揾個安全地方避下。」

「等陣先！啱先俾個條差仔掂過曬，嗰條友對手幾鬼dirty呀，黑蚊蚊又污糟邋遢，整嗱喳曬我個身，一定要洗乾淨啲。」

「咁你爽手啲啦，不過講開又講，點解班南亞仔會無端端變曬喪屍？」我問。



「當時嘅情況係咁嘅，嗰條鬍鬚核突佬狼到想摸我下面，我梗係死都唔制啦，所以搏命反抗，大大力咬佢耳仔，咁條友先肯放開我，and then個二撇雞阿差就喺嗰個時候，突然仆埋去咬個鬍鬚佬條頸，啲血四圍噴曬出嚟，you know，that is so freaking scary，我嚇到大嗌，然後條金毛飛都過埋嚟，俾嗰兩條友咬埋，再之後呢…」

「喂喂喂…唔好講啦…快啲閃…真係有…有喪屍…」

本來我專心聽緊對方講嘢，但過左一陣，從遠處聽到一啲腳步聲。

街燈閃爍不停，著嘅時候，睇到五十米以外，有約莫四五隻喪屍過緊嚟。

到啲燈唔著嘅時候，就睇唔清喪屍嘅樣，淨係得佢地反白嘅眼珠在移動。

見勢色唔對，我地當然係調頭逃跑。

跑左二三百米，Isabel又無端端停低落嚟，喺一間細鋪賣衫店門外揀衫。



「搞邊科呀你？呢時候仲有心情睇衫？」

「我啲衫褲差唔多兩日無換，又dirty又成陣味，一定要換架啦，你就等一等啦，我求其執幾
件衫褲就行得。」佢講完直頭入埋去揀。

喺鋪頭出面嘅我心急如焚，左望右望睇下有無喪屍，結果真係有。

忽然之間，真係標左隻喪屍出嚟。

好在我警覺性夠，即時避開。

「喂！你得未呀！有喪屍呀！」

「下！咁大獲！咁…咁你頂住先！」Isabel又閂左鋪頭度門，自己一個匿埋喺入面。



試過俾娟姐出賣過一次，所以今次我絲毫唔覺得意外。

講到尾，人始終都係要靠自己，除左自己邊個都信唔過。

我快步跑去隔籬檔菜欄，揾嚟放喺門外嘅手推車，跟手就用架車撞出嚟撞隻喪屍。

隻喪屍俾架車撞到成個人跪左上上面，我就第一時間隨勢連人帶車推走佢。

本以為可以順利碌走隻嘢，好衰唔衰，架手推車行左無幾遠，撞到唔知咩而停左落嚟。

因為路燈閃下閃下，導致我睇唔清，感覺好似係撞到地下一條屍而停低左。

好快隻喪屍起返身，又想衝過嚟。

不過又好彩嘅係，啲喪屍比較笨拙，無乜方向感，唔識檻架手推車，搞到自己仆街。



咁我梗係趁呢個機會調轉頭走佬，行到頭先間賣衫鋪，對裡面嘅Isabel大嗌：「喂！你走唔走架！」

「走呀走呀！等埋我！」Isabel攬住幾件衣物，開門衝出嚟。

之後我地兩個一邊逃跑一邊留意下，邊個方法安全可以匿埋。

然而大部分鋪頭唔係有喪屍，就係有死屍，又有啲裡面黑媽媽，乜都睇唔到，唔知係咩情況。

最後我醒起平時返工嗰棟大廈，附近嗰頭有間日本城，於是我就帶Isabel過去，睇下咩環境。