性交轉運打喪屍: （14）

「呢位小姐！我要求你立即停手，否則我會開槍！」

呢個時候，有個差佬企喺五十米外舉起槍，警告嗰個咬人嘅阿嬸。

我心諗條差佬洗唔洗咁怕死，企到無雷公咁遠，個樣仲驚到瀨曬尿咁款。

阿嬸放開個老坑，注意力轉移到差佬身上。

「做咩呀你！警告你唔好行埋嚟，我會開槍架！」個差佬騰騰震，幾乎連槍都揸唔穩。



個阿嬸不加理會，對住差佬衝過去。

「砰砰砰！」

個差佬連續開左三槍，三槍都射得中，但個阿嬸竟然一啲事都無，繼續行得企得，直衝埋去咬條差佬。

我睇到呆左，心諗呢班人係咪食錯藥？

老細捱左我一刀無事都算啦，呢個阿嬸中左三槍都可以無事，連頭先𨋢入面無曬內臟嘅屍體都可以返生，簡直就係不可思議。



「啊唔好呀！！！」條差佬一邊耳仔被咬甩，流血不止。

成條街家陣立立亂，周圍都有人咬人嘅情況，就連差佬都無符，為保安全，睇嚟最好都係返屋企避一避。

我偷走泊喺路邊嘅單車，打算全速前進，踩返屋企。

屎忽啱坐上座位，個咬人阿嬸，手臂被咬斷嘅老翁，仲有個差佬竟然連成一線，衝埋嚟想擒我。

我博命加速向前踩，三人就喺後面窮追不捨，一路追足我幾條街，直到轉彎入一條巷仔，我先至擺脫到佢地。



之後為左避開嗰班見人就咬嘅「怪物」，我盡量兜小路，大約踩左十分鐘，就返到屋企樓下。

本來以為今日運氣唔算最差，算叫做順順利利返到屋企樓下，殊不知好死唔死，嚟到門口先發現無帶鎖匙，開唔到樓下道閘。

呢個鐘數娟姐照計未出去買餸，應該仲喺屋企，於是我立即打電話向佢求助。

「嘟—嘟—」

電話響左兩下都無人聽，我個心開始急，因為啱先嗰三條友已經追到上嚟。

越睇越覺得呢班人似喪屍，不但打極唔死，而且俾人咬完就會變成同類。

「嘟—嘟—嘟—嘟—」響到第六下，娟姐終於接電話。

「娟姐，我唔記得左帶鎖匙，麻煩你落樓開門俾我！」



「『巧』呀，『梨』等等…」

「唔等得呀，依家即刻落嚟開門啦！快啲！」我極力催促。

「哦哦，咁『禾』『辣』即落嚟。」

三人逐漸逼近，我身邊除左一部單車之外，就無任何武器。

焦急不安嘅我喺心入面，呼喊住娟姐快啲落嚟開門。

然而時間一秒一秒咁過，三人距離我只有四五步之遙。

唉，等唔切啦，我唔可以坐以待斃。



喺佢地攻擊之前，我選擇先下手為強。

我雙手舉起部單車，大步踏前，成部車一嘢飛埋去。

結果俾三人合力擋住左，不過都勉強迫使到佢地，退後左兩三步。

跟手又用放喺街邊嘅手推車，連紙皮帶車推撞過去。

此時此刻，耳邊聽見開門嘅聲音。

娟姐終於落到嚟開門。

我二話不說，用最快速度跑入去，然後立即閂上閘門。

「『壞』邊咩事？『典』解有人猛咁拍門？」娟姐問我。



「唔好理佢地，總之出面好危險，千其唔好出去。」

呢道閘門係用鐵做嘅，斷估唔會咁容易拍得爛。