美好世界的沉思者/ADVANCING (重製): 0.8 永世的深切刻印

「哈～」
「早晨！」我行出房門就見到一早已經起咗身嘅阿雯坐係梳化度玩手機。唔記得講，阿雯尋日又係我屋企過夜，基本上放咗榜之後每個禮拜都有兩三日會一齊過夜。

「仲早?都 1 點鐘喇喎。」

「係咩?唔緊要啦，橫點都放假。」

「你去刷牙先，我整午餐俾你食。」佢講完就放低部手機行向廚房。

「唔使啦～」





「唔得！」

我捉住經過我面前嘅佢隻手，諗住俾個 morning kiss 佢，但就俾佢一野拒絕咗。

「刷咗牙先！」

「嗯...收到...」我帶住失望嘅心情行向廁所。
「係呀，我一陣約咗人，你唔使整早餐俾我喇。」





「約咗人？邊個呀？」

「秘密！」

「哼！懶神秘...」
「...唔通...你背住我...」

「唔係呀！我...約咗個人你唔識架。我要多謝佢，唔係佢我而家都未必可以同你 一齊。」

「信你啦，斷估你都唔會敢偷食。」




「咁你要好好多謝人先得呀，唔係就走寶。」

「係呀，你會走寶架～」

「係呀係呀係呀！刷牙啦，唔係一陣臭親人呀！」

—————————————————

而家我正企係地鐵嘅一角靜候今日嘅約會對象出現。 而此刻嘅地鐵站人頭湧湧，我諗佢地應該都係打算去動漫節買野嘅人，畢竟今日係假日。但而家已經晏晝，都仍然有咁多人都真係太誇張。

但我並冇打算去動漫展，一嚟我本身對於動漫或者遊戲嘅興趣真係不大，未到要去呢啲活動嘅地步；二嚟要我排咁耐隊入去，我真係唔得。

就係我一路聽住歌，一路觀察住呢班人嘅時候，有人從後拍咗我嘅膊頭。

「等咗好耐呀？」





「...唔係呀，啱啱到啫。」

而家係我面前嘅係阿瑩，佢今日身穿蕾絲露膊粉色上衣，搭配一條白色嘅熱褲，相信佢一路嚟呢度嘅時候，回頭率一定極高。

「我今日著成點呀？」佢講住就轉咗個圈等我可以一覽佢嘅裝扮。

「著得好靚，配搭得好好。」
「不過...你唔怕係咁俾人望咩？」

「咁...天氣熱吖嘛。」
「不過呢...頭先真係好多人望我囉。」佢講呢句嘅時候，特意湊近到我耳邊講， 感覺好似講緊秘密咁。

「咁人地望你...或者都係好事嚟嘅，證明咗你係吸引！」





「你啱！」
「行啦！又話帶我去食好西！」

—————————————————

「點呀？感覺點呀？」

「啲野幾好食，成個感覺都好舒服，望住師父整野食好型。」
「不過應該都幾貴。」

「放心啦，講咗今餐我請你架嘛～」

「我都係俾返我個份啦。」

「幾千蚊架喎，你俾得起咩？」





「咁貴？！」

「收返埋佢，俾我請埋今餐，之後都冇機會架喇。」

「點解呀？你發生咩事呀？」

「我要去外國讀書，所以見唔到面都請唔到你食野。」

「...咁...你加油喇！」

「嗯！」
「係呀，呢到有份小小禮物送俾你。」我從我嘅背包攞住一個袋仔出嚟俾佢。

「又要你請我食咁高級嘅野，又送禮物俾我，唔係幾好嘅。」





「收咗佢啦，都買咗咯。」

「咁...咁就多謝晒！」

「唔拆嚟睇吓？」

「可以呀？」
「...咁我拆喇。」

佢小心翼翼咁從個袋中攞出一個盒，再小心謹慎咁慢慢打開個盒。

「呢個...」

「係頸鏈。」
「唔好意思，我唔係好知送啲咩好，咁...就揀咗呢份...」
「我幫你戴起佢？」

「唔該...」

「點呀?」

「好靚...」

「咁就好喇。」
「我一陣送你返去。」

—————————————————

出咗鋪頭之後，佢突然拖起咗我隻手。我心知道我係應該即刻拒絕，但係...都最後一次，冇所謂嘅，我知道我心中向住嘅唯一一個係邊個就得，咪當滿足佢一個小小嘅願望囉。

「我到喇。」不知不覺間就已經返到佢屋企樓下。

「嗯，咁...拜拜。」

「拜拜。」 講完我地就各自轉身離去。

「呀！阿瑩。」行行下我停低轉身叫住佢。
「我好開心可以識到你。多謝你。亦都多謝你當時係主題公園同我嘅一番說話。」

「？...嘻...」佢聽到我嘅說話後思索咗一陣就笑咗下。
「咁你去到生生性性呀！同埋記得返嚟呀!唔好要人等咁耐！」

「嗯！」
「咁我返到嚟都要見到你拖住個對你好好嘅男仔架！」

「仲要係個好過你千倍嘅男仔！」

「嗯！拜拜～」

「拜拜～」