美好世界的沉思者/ADVANCING (重製): 0.4 謝恩師

「哈~」

「咁早就係度放蚊。」

「你都識講啦，早吖嘛，哈～」講完我再打多個喊露。
「我去買支水先，你係度等我。」

「唔使啦，你飲我呢支。」

「會唔會唔係咁好呀，好似好唔衛生喎。」





「家下我係你女朋友喎，你介意呢啲？」
「仲有唔好咁唔環保啦，買多支水就用多個膠樽。」

「係係係，你啱，我而家飲。」
「...咦？有浸甜味嘅？」

「係？我試下先...冇呀，咪普通嘅水。」佢接過我手上支水飲咗啖。

「...唔係喎，我再飲仲甜啲喎」我再飲多啖。




「可能...係你飲過，哈哈！」

「唔好笑囉！」
「行啦！放榜呀今日！」佢講講下就急步行咗上去。

「唔好笑你塊面又咁紅？...喂～等埋呀～」

—————————————————

「點呀，考成點呀?」





「ok 啦，咪都係咁，不過不失。」我望住我張 DSE 成績表講。

「反正外國嘅學校都收咗你啦，唔係咩?」

「咁都係，你都講都啱，我唔需要太介懷個分嘅。咁你呢？你又點呀？」

「幾好呀，我好滿意！睇下！」

講完佢就遞咗佢份成績表俾我。而上面就咁望一眼都見到有唔少嘅星係上面。

「得喎！7 科有 5 科都 5 星星，仲有兩科都有 5！」

「知我叻le～仲唔讚我！」





「你最叻！你最勁！」
「不過...離開咗你幾個月成績就好咗咁多，睇嚟個效果幾唔錯喎～」

「講咩呀你！又想扔低我？！打死你！打死你！」講完佢作勢咁輕輕打咗我幾下 。

「講笑講笑！放過我！講笑咋！」
「呀！阿傑佢地叫我，我行開一陣先，拜拜～」

「當我聾架？！根本就冇叫！哼！」

—————————————————

嘩～睇嚟呢幾個月佢唔只成績好咗，仲大力咗，走遲兩步都聞到棺材香呀真係。

「點呀賢仔？滿唔滿意呀個分？」





「嗯？Miss Cheng...都 ok 啦，就係有啲卷因為有事考唔到啫，其他有考嘅我都覺得唔錯，都滿意。」

「滿意咁咪好囉，估唔到場意外同啲復康治療都影響唔到你嘅實力。」
「咁你之後諗住點?」

「見步行步囉，不過好彩嘅係有間瑞士嘅學校收咗我，所以我下個月就過去喇 。之後嘅...之後先算啦。不過...我會想讀醫做醫生囉。」

「醫生幾好吖，不過好辛苦個喎讀醫，你得唔得架？」

「一定得！因為我係真係想做醫生，咁我就肯定會有恆心會有毅力讀落去！唔會中途放棄！」

「咁你加油啦！有咩需要我就隨時message我啦！」

「嗯！」




「...呀！老師，我呢度有少少心意希望你可以接受。」

「鋼筆？」

「嗯。其實...送啲咩我唔係好有諗法，咁送俾教職員嘅...我淨係諗到鋼筆...」

「幾好吖，多謝晒。」

「你鍾意就好。多謝你呢六年嚟嘅教導同埋照顧，你唔係只係教導知識，仲會教人生道理，處世態度。係最後都多得你嘅一番說話，我先可以同佢重修舊好 ，關係回復到原先咁。真係多謝你！」

「你有學到野，對你有幫助就得啦！以後都記住我同你講嘅野呀！我等住飲你地個餐架！你地唔好俾兩餐我飲呀！飽架！」

「哈哈哈～一定！一定！」