我是一個學界的灰姑娘: 164. 我地同居生活

醫科生嘅課程果然好深，我同Ethan經常要溫書溫到好夜，所以我每次去到佢屋企果時，Miss Lam總係準備左中藥同煲湯俾我地
 
而且我係Ethan屋企溫到好夜，佢成日都要送我返屋企
 
於是，Miss Lam有一日同媽咪講
 
「美姐，不如叫家琪平日晚黎我到，放假先返妳果邊?」
 
「點得呀，佢會阻住妳地架嘛」
 




「美姐，妳放心啦。浩揚同家琪都係成年人啦，佢地拍拖咁耐，妳覺得家琪仲係細路女?」
 
「咁一定唔會，佢地兩個後生嘅我都明白。但係真係怕阻住妳一家人呀」
 
「佢地兩個平日夜晚係我到飲完湯，通常立即溫書。有時去到12點，浩揚送完家琪返屋企都1點，然後家琪又要等浩揚沖涼後先肯瞓，佢地休息時間一定唔夠」
 
「我都明嘅」
 
「我同我先生諗過不如俾佢地兩個同居，住珍珠閣嘅，不過佢地兩個後生一齊住嘅話…」
 




「唏!肯定餐餐食外賣，家琪呢個無飯煮婦黎」
 
「所以我先想叫佢黎我到住，假日佢返屋企放鬆下」
 
「唔…都好嘅，佢有功課唔識，兩個都幫到大家，又可以問林醫生」
 
於是係Yr2，我搬左去Ethan屋企到住，今次，我同佢同房，為左我，佢換左張雙人床
 
我係Yr2果年，受到Miss Lam一家影響，去左上慕道班，連同媽咪同偉叔，我地一家三口一齊領洗
 




每一晚，我同Ethan都係到不停溫書。因為我地要成為一個醫生
 
但係，想做醫生嘅，唔止我地兩個
 
係Ethan隔離房，有一位皇仁書院嘅學生，每晚不停係到溫書
 
係佢身邊，有一個大坑真光嘅少女係到陪住佢
 
「喂，佢地兩個係咪疏遠左呀?近年咁少見佢地孖鋪嘅?」
 
Ethan拍一拍我個頭
 
「妳on9架?慧思同浩翹F.3啦，仲一齊瞓，妳睇下姑姐咬唔咬死浩翹」
 
望住呢兩個小朋友慢慢長大，我覺得自己責任愈來愈重




 
因為Miss Cheung講過，慧思最聽我講
 
係佢F.3果時，佢走黎問我揀科問題
 
「家琪姐姐，我唔識揀科呀…」
 
「嗯?妳有咩科想讀?」我放低本小說轉身問佢
 
「我冇姐姐妳同浩揚哥哥咁叻…我又唔識計數」
 
的確，佢D數學真係比較差
 
「妳最鍾意咩科?」
 




「英文」
 
「仲有冇?」
 
「唔…英國文學同history….」
 
「妳歷史好叻喎」
 
「幾咁啦」
 
「不如咁丫…History加Eng lit再加…Geog?」
 
「咁樣…」
 
「完全係大白鯊教嘅科目，佢仲可以教埋妳添」




 
「好!咁我信家琪姐姐妳啦!!」
 
我摸下佢個頭
 
「Clodulf呢?佢係咪揀我同Ethan一樣嘅科目?」
 
慧思點一點頭「係呀，唔知點解佢會有咁多Notes，除左英華同皇仁，英皇d Notes佢都有」
 
「Ethan拎俾佢架嘛，有時我見到Clodulf仲辛苦過我」
 
我望實慧思「妳呀，得閒要陪下佢先得架嘛，妳地兩個青梅竹馬，佢有咩事妳一定知嘅」
 
「我呢個阿哥有咩係瞞到我架咩?」
 




「妳係咪有男仔追呢?」我好奸咁問佢
 
「邊有丫，我中學以來識嘅男仔，2隻手指數得哂。只係有男仔幫過我拎野者，仲要係同學個阿哥」
 
慧思食完飯後就同大白鯊游返落32樓
 
浩翹就一臉倦容咁坐係房到飲中藥