我是一個學界的灰姑娘: 45. 送俾佢嘅髮圈

到左約定嘅星期三，我同佢兩個人係自修室溫書
 
因為果間係西區唯一一間自修室，所以有唔少佢同學，仲有我同學同埋其他學校學生黎溫書
 
佢將一大堆範圍放係我面前
 
我輕聲問佢
 
「咩黎架?」
 




「我係電腦檯到搵到，媽咪考慮出嘅範圍」
 
「電腦檯?」
 
「我走入佢地房到搵架」
 
「喂!我講下咋!俾Miss Lam知道，你同我都冇命」
 
「怕咩丫…家姐經常性咁做」
 




「你呀!傻架咩，溫書啦」
 
其實唔洗Ethan幫我，我次次測驗考試都唔會低分
 
因為我F.1果時已經應承校長
 
我同佢兩個人一溫書，就溫到忘哂形
 
終於，我條頸又開始攰啦
 




我摸住好攰嘅頸，忽然，佢伸隻手過黎
 
幫我按摩穴位
 
「係…係…呢個位…呀…好酸呀…」
 
「妳頸椎好返哂未?」
 
「而家間唔中去下雪晴姨姨到拉下頸囉」
 
佢用力撳我頸上穴位
 
「記住呢D位啦，阿姨上星期教我撳呢D位」
 
「唔係你幫我按咩?」我笑笑口對住佢




 
「妳想?」
 
「咁….你按得好丫嘛」
 
「家琪呀，我想問妳拎D野」
 
「嗯?你想要咩?」
 
「妳有冇髮圈多?」
 
髮圈?做咩呀?
 
「有呀」
 




「俾一條我丫」
 
既然佢想要，我就俾佢啦。我將我扎緊嘅馬尾拆開，將個髮圈交俾佢，然後再用另一個髮圈扎返馬尾
 
我見佢將髮圈戴係佢右手上邊之後繼續溫書
 
莫非…佢對我有意思?
 
我地大約溫到8點，浩揚又送我返屋企
 
「你次次都送我返宿舍，返到屋企咁夜，會唔會俾Miss Lam鬧架」
 
「呵呵，我肯去溫書，佢點會鬧我」
 
「其實…佢知唔知你係同我去架」




 
「佢應該唔知，佢唔會過問我d野嘅」
 
我地靜靜地咁行
 
突然間，佢捉實我隻手拉我埋佢身邊
 
咁…咁快?我仲未準備好架…暫時只係好感咋…
 
「妳呀!!小心d呀!!紅燈呀!」
 
我抬頭一睇，係喎，紅燈
 
「唔該你呀…」
 




「妳太攰呀?」
 
「唔….少少咁啦」
 
我係到唔左幾聲，佢仍然捉住我隻手
 
忽然佢將個書包孭係前邊，再將我孭上背
 
「喂!!我著長衫架」
 
「又點?」
 
「你…你摸到我…大脾啦…」
 
「咁又點?」
 
「咁…你都要小心唔好搞到我走光先得架…」
 
「呢到冇人喎」
 
我面紅紅嘟長個咀對住佢
 
「仲唔行?」
 
就係咁，浩揚就孭住我行。我將個下巴掂住佢膊頭，呢個男仔…第一次見面就保護過我，雖然之後佢都成日笑我，但係佢俾到安全感我，單係剛剛佢捉住我隻手，我就覺得好安全
 
「放低我啦，到啦」
 
我地兩個有d尷尬咁企係到
 
「下次見啦」
 
我好快走返入學校，成塊面都紅哂啦!!!!!