我是一個學界的灰姑娘: 18. 算啦，原諒妳地啦

我可以幫我D同學做到嘅都做左，愈來愈多同學黎同我道歉
 
而主謀係諗清楚後，亦都走黎同我道歉
 
「Natalie….好…好對唔住….」
 
「Evelyn，點解妳要咁做?」
 
「因…因為…..」
 




「妳同我都係同一小學升過黎，即係妳知道我註冊果日發生咩事」
 
「我知….」
 
「係佢叫妳咁做?」
 
「係….係佢同我講，妳用手段迫佢走…」
 
「咁妳都會信?」
 




「初初我都信……但係尋日….小學班主任同校長突然登門……我先知……」
 
估唔到校長可以令到我小學班主任同校長去登門探訪，我靜靜地望住佢
 
「果時先記得…妳係小學咁多年都冇害過任何人…所以妳一定唔會做d咁嘅事」
 
開始有其他同學為佢求情
 
「Natalie呀….得妳可以救到大家咋…..」「Natalie….妳幫下我地啦」
「妳…叫我地做咩都會做….」




 
我慢慢咁起身，準備出去
 
「Natalie!!!!」
 
「要我原諒妳地，冇問題，唔洗做太多野，唔洗當我大家姐咁睇」
 
「真係?」
 
「請我飲可樂咪得囉」我轉身對住佢地微笑
 
「真係?」
 
「一罐/枝好啦，唔好一人一罐/枝，我唔想糖尿」
 




我講完就出去準備搵大白鯊同Miss Lam，不過再諗到一樣野，所以我伸個頭返課室
 
「要凍架!!!唔凍嘅可樂飲黎做咩呀?」
 
我去到教員室，見到食緊薯片嘅大白鯊同Miss Lam
 
「家琪妳真係唔追究?」
 
「唔啦….尋晚同媽咪食飯果時傾過….與其搞到大家咁樣，倒不如以德報怨」
 
大白鯊望住Miss Lam
 
「家琪妳真係冇問題?」
 
「Miss Lam…林醫生會唔會揀病人去睇症?」




 
「我爸爸當然唔會」
 
「我…夢想係做個醫生，所以….總唔可以咁樣斤斤計較…」
 
「但係佢地咁對妳…」
 
「A simple act of caring creates an endless ripple that comes back to you，我相信班同學唔會再亂黎」
 
Miss Lam諗左一陣，我記得媽媽有封信要交俾佢
 
「Miss Lam，我媽咪有信俾妳」
 
Miss Lam接過封信，同Miss Cheung睇完之後再望下我





「凡事太盡，緣分誓必早盡」
 
「好啦，我同校長講妳唔再追究」
 
「唔該Miss Lam…」
 
「家琪妳有冇食哂個飯呀?」
 
「有呀Miss Lam，唔該哂妳」
 
「總之，妳每日都要食我煮嘅飯，呢個係校長嘅命令」
 
「知道」
 
大白鯊呢個時候又加把咀




 
「我呢我呢?」
 
「妳咪自己煮囉」
 
「哎呀~自己煮好麻煩架」
 
「有問題?」
 
「咁我都就快搬去妳樓下到住啦，大家有個照應好d嘅」
 
「妳唔識煮架咩?」
 
「唔好啦，姐姐妳係最好架」
 
Miss Lam真係立即反白眼，但係佢都應承左大白鯊
 
我返到課室果時，班同學帶左我去小食部，再叫我拎住枝好凍好凍嘅可樂
 
大家一人一枝
 
飲完枝可樂之後，大家就做好姊妹
 
對抗大白鯊(係冇可能嘅事)

班同學真係好幫我手，大家關係愈來愈好，而且大家都好擔心我生活
 
係某個星期六，我屋企門鐘響起
 
“叮咚”
 
我踢住對人字拖走去應門，係我班幾個同學
 
「Evelyn?妳地幾個黎做咩?」
 
「我地黎幫妳手架」
 
「幫手做咩呀?」
 
「幫妳手去執野賣」
 
「但係我同左校長講…」
 
「我地係自願黎幫妳架」見佢地真係著d普通T shirt上黎，睇黎佢地決心好大
 
「好啦，妳地入黎先啦。我換件衫先」
 
佢地企入我屋企，係到研究一個細小空間，點可以放咁多野
 
當我換好衫之後，我就同佢地出發
 
出發前，一人派對手套先
 
我帶佢地去後巷拎部車仔一齊係北角周圍巡視業務
 
估唔到我呢幾個同學非常眼明手快，而且佢地完全唔怕污漕
 
佢地搵野執野嘅速度，比我更快。係好短時間內，我地幾個女仔執好兩車紙皮加爛鐵之類拎去賣
 
返到我屋企果時，我問佢地點解可以咁快手搵到紙皮同鐵
 
原來，佢地係用科學方法分析
 
呢D廢棄物一定唔會出現係繁忙大街，最多嘅地方一定係地盤同街市
 
佢地係黎我屋企前已經做好分析同埋計劃好路線，所以搵野速度比我更快
 
執野去賣都要用腦去分析，真係長知識了
 
之後嘅星期六日，佢地都唔怕辛苦黎我屋企幫手
 
佢地有d我屋企坐下，完全唔怕我屋企又細環境又差，有同學將佢地用舊左嘅電腦送左俾我。我地幾個仲會係我屋企，用有限食材黎煮一d野出黎食
 
我亦都經常收到Miss Cheung俾我嘅英文書黎睇
 
最後校長見佢地肯承認錯誤，所以全班嘅大過取消，改為優點一個，而我就有一個小功
 
但係一次意外，就令我同媽媽生活有好大轉變