我是一個學界的灰姑娘: 13. 怒火中燒嘅小敏姐

不愧係band 1學校，開學第一個月已經有測驗
 
夜晚我係屋企張檯仔到溫書媽媽時不時會問我有冇識到朋友，夠唔夠錢用等等。每次媽媽咁問，我都向佢微笑就算，其實佢自己都明白，我一向都冇咩朋友
 
9月嘅測驗派發成績
 
我係Miss Lam手上接過成績表
 
「恭喜妳啦Natalie，妳第一次測驗已經考第一」
 




其他同學好唔相信，係佢地眼中，我只係一個垃圾妹
 
佢地估唔到，我成績係拋離佢地咁多
 
但係佢地仍然係我背後竊竊私語，而且佢地嘅行為一次比一次過份。有次仲「唔小心」咁整污糟我套校服，有時仲黎暗串我帶飯，同埋食d清茶淡飯
 
但係佢地即將為佢地嘅行為付出代價
 
果次佢地又係拎我做目標，想將d水倒去我件校服入邊
 




佢地打開一睇
 
「下!!?妳要問人拎舊校服著呀?」
 
「有…有咩問題呀!?」我面紅紅咁回答佢地
 
「著人舊衫，妳唔係真係咁嘛，垃圾妹!?尋晚有冇執垃圾呀?黎!我幫妳沖乾涼」
 
佢地真係打開我件衫，倒左d水入去
 




咁大個女俾人第一次咁蝦法，我入邊件底裙都濕左，忍唔住自己去廁所喊
 
我雙眼腫腫咁行出去，一出門口就撞到一個人
 
「家琪?」
 
「小敏姐姐?」
 
小敏姐姐同佢d同學路過洗手間
 
「妳做咩全身都濕哂架?」
 
「姐….姐姐…..」再忍唔住喊出黎，再攬實佢喊
 
「係咪有人蝦妳呀?」




 
我點一點頭
 
「又笑妳屋企環境唔好?」
 
「嗯…佢地仲笑我用人舊校服」
 
「妳去我地班房先，我地幫妳抹下先啦」
 
我俾小敏姐姐佢地帶去3D班，一班大師姐幫我抹乾、用風筒吹乾件校服(點解會有風筒?)
 
小敏姐姐爆發了，佢係課室到熱身
 
「Jasmine呀….話俾Miss Lam知會唔會好d呀?定係話俾大白鯊知…..」
 




「妳覺得佢地會驚我媽咪咩?如果就咁將d人交俾姑姐，佢地唔識驚架。家琪，佢地仲有講d咩?」
 
「佢地話…邊個師姐咁肥?俾d校服我，可以著到畢業…」
 
「姊妹!我地一齊去!!!」
 
「好!!」
 
我覺得小敏姐嘅怒火，有85%係話佢肥
 
我懷疑呢班師姐係咪受到佢地班主任Miss Cheung影響，個個都好似惡霸咁樣
 
睇黎都係唔好得罪佢地比較好
 
小敏姐姐同我返到1E班，佢一腳就伸開道門




 
「邊個淋濕家琪!?同我死出黎!!!!」姐姐雙手撓住，好有氣勢
 
淋我果個同學走出黎
 
「做咩呀?妳要保呢個垃圾妹呀!?」
 
係咪有打交睇?我未見過女仔打交，傳聞女仔打架好好睇
 
「我問妳點解淋家琪呀!?」
 
「咁垃圾妹要沖涼嘛」
 
「我覺得妳都要沖涼喎」
 




「關妳咩事!?」
 
雙方如箭在弦，然後，總係有探子通風報訊
 
好快，有同學走黎打鑼更
 
「紅旗!!!有鯊魚呀!!!!!」
 
但係小敏姐姐依然企係到
 
「姐姐….不如算啦…大白鯊就黎啦….」
 
「我程詩敏洗怕佢?!我今日點都要為妳出一口氣架啦!!!」
 
「但係上次妳已經…..」
 
此時，大白鯊登陸了