為了實現媽媽遺願，我成為了女兒國唐僧: K763

健：「阿欣話，睇你兩個個樣就知肯定有玩過。」呢條友，乜都聽晒姐姐話，睇怕遲早會背叛我。
我：「玩…猜包剪揼然後閹呀，咪咁多幻想好唔好？」
健：「唓，佢都應該唔係處女嚟啦，怕乜講喎，況且你咁曳又點會唔教壞佢。」
我：「你咁想知就自己問佢，我唔想死住…喂，我打咗三個div喇，幫手整個框落去等我睇到佢喺邊。」
健：「咁hea㗎，你打晒我哋三個名落去就算。」
我：「未諗到寫乜呀，起碼睇到對唔對位先啦。」
唉，有啲後悔點解唔揀Econ，雖然話無興趣啫，但起碼有QQ教我先，如果夾硬嚟嘅話我或者重可以同佢同幽蘭一組，名符其實兩個女神自由騎。
搞咗一陣都係得條黑線圍住個div，最多整粗少少，好肉酸，都唔知出面啲網站係點整出嚟嘅…
F：「哈囉，兩位係咪等咗好耐？」露娜佢終於嚟到。
我：「唔係呀，妳睇下，得丁屎咁啲多就知我哋先係啱啱坐低開工。」得幾組黑色新細明體字，加幾個黑框…我都唔敢講其實已經等咗佢差唔多成粒鐘。




阿健個樣又係攪笑，一有女坐落嚟就全身硬直咁，明明頭先重喺度八緊QQ啲嘢；睇嚟佢係對住我呢啲熟人先係真正大個仔，一對住其他陌生女仔就即刻打回原形，名符其實嘅外強中乾，抵你條友俾欣姐食住。
F：「哦…咁就好…有乜嘢要我幫手就出聲啦。」
我：「未有住，佢打緊CSS，妳可以坐下先。」其實我好想講，妳係咪諗住嚟free歪㗎？無所謂，妳唔使做嘢㗎，交功課之後幫我哋揼返邪骨就得㗎喇。
反正，本身就無諗住佢幫到啲乜嘢手…本身諗住可以同細龜一組，佢個樣都似係識啲嘢，最衰係死人頭天王星；奈何呢個女班長實在係太過霸道，我都無佢符，唔通同佢講用我個龜頭換返細龜返嚟咩…
聽日又要對住呢個女仔，一個睇過我龜頭嘅女仔…
至於眼前呢個女仔，著住一件mocha色嘅hoodie，入面係低胸白色背心，下面係灰色中裙重有對白色高筒boot…順便講埋佢個樣啦，偏細粒，甲字面，頭髮係類似鬆身嘅傘菇頭，前面劉海有好多勾勾咁，樣唔算差嘅，身材亦有啲，最重要係化咗個比起返學起碼三倍厚嘅妝，加埋銀頸鍊同大大粒耳環。
明嘅，姣妹理所當然係咁款，以前䁽過佢IG所以知道大概；認真講就唔差嘅，色香味都高過屋邨妹細蚊一截，但我而家日日對住班女神，呢啲貨色實在已經刺激唔到我…
俾著兩年前，我重唔flirt到佢一係反枱，一係就反唇；嗱，唔好同我講妳咁嘅樣係乖乖女呀，我先唔信。
佢坐咗落嚟之後即係靜晒，得返阿健喺度打code，點知三分鐘唔夠個傻仔放枱面部電話連續震咗兩下。