為了實現媽媽遺願，我成為了女兒國唐僧: K740

醫：「喂，你中一之後都未嚟過喇喎，攪乜呀？」佢又唔係鬧我，係女朋友抱怨條仔咁嘅款。
我：「欸…無呀…因為麻煩…所以無嚟。」其實只不過係中二三兩年無嚟咋嘛，做乜講到十惡不赦咁喎。
醫：「繼續唔好嚟吖嘛，增加我工作量。」佢好串咁講。
我：「對唔住呀…其實係咪好多人無嚟㗎？」據我所知，調查，統計，推測，應該有成半學生係無嚟嘅。
醫：「幾啦，坦白講如果全部學生嚟晒係會絕對唔夠醫生，咁就會做死我。」
我：「如果妳想輕鬆啲，我下年可以唔嚟㗎。」
醫：「點可以咁㗎？！如果身體出咗事點算？」
我：「應該無事嘅，感覺上一切正常。」
醫：「感覺！？你當自己醫生呀，知唔知好多學生連自己近視都唔知呀。」
我：「其他就唔知，近視呢樣嘢就一定唔會發生。」我明㗎喎，昅女咁重要，遠近皆宜，遠嘅要望操場對面坐喺度嘅女學生，近嘅要睇QQ粒硬釘，兩者皆不可拋。




醫：「咁唔好廢話，即刻嚟驗咗眼先。」
我：「全部都係E字嚟喎。」
醫：「你係咪太耐無嚟唔記得點玩…你係要答我嗰三隻腳仔指住邊個方向喎。」佢瞠大眼仔望住我。
我：「OK…上左左右…下左右下右…上上…」呢個遊戲好無聊，就算你搵晒廿六粒英文字出嚟都唔會難到我。
例如ABC…係C cup！醫生姐姐一定係C！係完美嘅港女size，只係細過離晒大譜嘅QQ少少。當然，韻婷嘅心口都係好值得令人懷緬。
醫：「又真係幾叻仔噃，最尾嗰行都答到晒。」
我：「使乜講，視力呢啲唔係感覺嚟，係事實。」
醫：「讕醒，哦，係咪因為無溫書所以先無近視呢？」
我：「都唔係嘅，主要係打得唔係太多機。」又唔係講大話吖，以前我落去打棋嘅時間一定多過打機。
醫：「哦，你係咪聽到我講嘢？使唔使做聽力測試？」




我：「如果我答你聽唔到，係咪即係證明我聽到？」
醫：「我講嘢你就梗聽到啦…不如試下呢啲。」佢攞咗部電話出嚟，然後開始製造一啲噪音。
我：「乜…電話喇叭可以播到廿hz以下嘅聲音㗎咩？」
醫：「咪嘈啦，聽唔聽到聲呀？」
我：「聽到㗅㗅聲，重有冷氣機聲…」
醫：「咁而家呢？」
我：「聽到蚊吱咁嘅聲。」
醫：「係咪兩隻耳仔都聽到先？係就唔再試。」
我：「係，一邊入，一邊出，兩邊都好清楚。」
醫：「咪玩啦，而家要度高磅重。」




呢啲例牌嘢，放低電話銀包再除鞋就行上去。