為了實現媽媽遺願，我成為了女兒國唐僧: K734

Q：「你唔試下點知呢，起碼主動啲，出閘送到人哋去樓下吖嘛，可能有意外收獲呢？」
我：「咪傻啦，我點會嘥多幾蚊拆開兩程車搭。」
Q：「孤㞗寒，乜佢無話畀返車錢你要你出閘陪佢咩？」
我：「妳唔係真係諗住佢冧我呀…而且，重有…我跟妳哋搭其實係為咗同妳一齊返屋企，因為知道妳會好悶。」
Q：「咁你大可以同我搭到去九龍，唔一定要跟佢落。」
我：「等佢開心下啫…而且死跟妳，佢又話我哋有路㗎喇…」
Q：「是但啦，都慣，佢哋不朽話我哋兩個有路㗎啦，但你跟咗佢落車，就唔驚我覺得你同佢有路嚕咩？而且重攪咗咁耐。」
我：「妳應該好清楚妳姐妹至係，佢鬼得閒同我有路。」
Q：「哦，佢滿足唔到你，你都可以搵EX填補返下嘅。」
我：「欸…唔好講其他女喇，始終我都係嚟接返妳一齊返屋企。」




Q：「你終於知九龍返你屋企陰功嗱？最衰都係死人易汪，偏偏住我隔籬站攪到我想搭少啲都唔得。」
我：「其實個距離明明唔遠，但就要搭鬼咁多站。」
Q：「係囉，兜兜轉轉咁，乜色搭齊晒環遊九龍都重未返到去。」
我：「唔緊要啦，所以我咪嚟陪妳一齊環遊都幾開心吖。」其實最重要有妳喺身邊，而且車錢不變。
Q：「早就應該次次陪我啦，俾著以前呢段路我實搭的士。」
我：「我次次死跟住妳，咁就真係變咗礙眼㗎喇。」
Q：「你做易汪隻兵唔礙眼？你聽晒天王星話唔礙眼？」
我：「好好好，以後陪到嘅我都會陪，橫掂…我喺屋企等妳返嚟嗰段時間都會好寂寞。」
Q：「係咩，唔信，乜唔係正好有個空隙畀你攞嚟睇鹹片同打飛機咩？」唔該妳唔好咁料事如神啦…
我啞口無言而佢亦都懶得乘勝追擊，索性撓住我隻手挨下…不過大家都知挨條毛，呢程車轉線轉到傻。




雖然有啲詏撬，不過返到屋企就仍然係我哋嘅溫馨時間…因為爸爸喺度一家三口好溫馨，唉唷。
理所當然佢沖涼先，戴Bra出返嚟…然後到我沖，點知我沖完出返嚟見到佢喺度乖乖女將啲污糟衫掉落洗衣機。
我：「我爹地喺度啫，妳都唔使扮乖嘅。」乖唔乖都唔係最大問題，反正無論如何佢嘅底衫褲都會俾人睇晒。
我唯有幻想媽咪其實好正，爹地點會對呢啲碎布有興趣…
Q：「殊，咪嘈呀，我喺度係因為咁樣我哋先可以自由。」一眼望晒嘅屋企，自由更顯難能可貴。
當然有啲屋好大都係一眼望晒，因為有CCTV。
我：「做乜喎，我哋匿喺度咁耐好可疑㗎。」
Q：「可疑又點，唔通佢會專登行出嚟踢爆我哋咩…」
我：「咁妳想點先，其實我哋又有乜好踢爆…」
Q：「易汪有得同你玩，我又要玩。」