為了實現媽媽遺願，我成為了女兒國唐僧: K695

可惜地鐵入面太多人我唔可以太猖狂吖…唔好問我做乜唔搭巴士，因為架2E實在太出類拔萃，搭到去應該是差唔多可以散band。
例牌嘢無謂講啦，啲妹妹仔次次見到我就用盡全力踢過嚟，我重要調整角度食到應幫佢哋卸力，因為踢空氣唔識收力其實好傷身。平時佢次次都係最遲走嗰個，今日玩咗一個鐘都無幫啲妹練完一圈就走先，重點係佢要去廁所換衫無得睇佢健康嘅身材。
有密碼嘅我哋就咁樣自出自入間band房，十分兒戲。
我：「其實…打空手道就話做下靶啫，我喺度都無嘢幫到妳嘅。」
U：「喂，家陣陪下我使唔使好似要你去死咁，定係你要去溝女先？如果係就話我知溝邊個，跟住放你走。」
我：「又唔係，但呢度講真無嘢啱我玩…」又無人教我嘅，如果幽蘭喺度捉住我手仔彈結他就話啫。
U：「你對Queenie同Yvonne咁好為乜？係咪佢哋畀咗好多甜頭你，定係我就真係咁差？」呢啲嘢妳邊會明。
我：「無啲咁嘅事，我陪妳就係啦，妳好好努力。」
換返校服嘅佢開返部DTX喺度練鼓，兩隻腳分開踩住踏板，只要我一坐喺地下又可以望到…佢鍾意藍色。
U：「你個仆街仔又喺度昅乜呀，正一冚…」有時我都戥佢哋辛苦，次次爆到某句粗一諗起就要煞停。




我又無嘢嘅，講真有幾多人屌人老母係講得出做得到吖，除咗鍾意爆粗鬧仔女嗰啲仆街老竇。
我：「悶吖嘛，咪欣賞下靚女婀娜多姿嘅優美景色。」
U：「算，一早知你無得救，但好心你有時間就溫下書做功課啦，平時你一條友喺屋企咪又係嘥晒啲時間。」
Sor，唔好意思我爹地返咗屋企，不過我費事講喇，一陣佢放我走都唔知返唔返去食飯好；我聽佢話打開咗本數學書計下啲level 1嘅數，計咗四五條我又喺梳化瞌著咗。
U：「衰仔，咪瞓喇。」我諗瞓咗半粒鐘都無，該煨。
一擘大隻眼就見到佢隻大髀喺我隔籬都幾驚嚇，唔知佢係咪為咗方便打鼓所以揄高咗條裙呢？
我：「嗯…係咪練夠…諗住走喇？」
U：「走你個頭呀，你喺邊都一㞗樣咁懶㗎啦，可唔可以幫手落去買兩個飯盒返上嚟？」
我：「唔落去食？呢度都幾多選擇。」
U：「唔喇，落去兜個圈好嘥時間，你幫我買啦，如果你鍾意可以喺下面食埋先嘅，嗱，錢喺度喇。」




我：「一百蚊咁多？呢頭啲嘢食唔使咁貴嘅。」
U：「請埋你食啦，見到易汪對你咁好，我都無理由太刻薄你嘅。」