為了實現媽媽遺願，我成為了女兒國唐僧: K682

鄧：「作你嘅文啦，我錯一粒都唔夠你啲錯字多啦。」
我：「我錯十粒字都係扣十分啫，妳數獨錯一粒就滿盤皆落索。」佢死死氣咁掹返粒四出嚟。
鄧：「呀…唔玩呀！邊鬼個set版咁難，俾我知道實扣佢分！」渣妳就渣啦，明明呢版都只係中級到咋嘛，至於邊個set就梗係女班長啦重使問。
返學又對女神，放學又對女神，喺屋企又對女神，開始已經無乜感覺，就好似我嘅生活已經俾佢哋霸佔晒咁。
臨放學嗰陣佢哋將塊紅布勾喺壁報板上面話要剪綵畀評判睇咁話喎，懶得同佢哋癲，所以我放學即閃。
其實係我今日有嘢要做，唔好以為我對厭咗佢哋幾隻嘢。
Q：「喂！做乜一打鐘就唔見咗人㗎？！就連健仔都喺度，你條友仔趕住去邊？」我都唔知係佢想問定係其實只係做代言人，不過是但啦。
我：「我咪幫咗手整囉，評審呢啲關我叉事咩。」
Q：「係唔關嘅，你！係咪趕住去溝女？」攪笑，同我有關係嘅女人都留晒喺課室，係溝就唔會走啦。
我：「細蚊話有功課唔識做，我去睇下乜事咋嘛。」




Q：「哦，即係溫女啦，記住玩得開心啲。」
係喎，QQ話過絕對唔可以對佢講大話…雖然只係玩玩下，但佢又真係有可能撞到或者問返細蚊。
我：「講笑咋，佢真係有嘢唔識我叫佢問妳好過啦，我有啲正經嘢要做，唔關女事嘅。」
Q：「做乜呀？約咗去割包皮呀？」妳真係識講笑。
我：「我先唔會割呀，塊包皮咁可愛，而且咁鬼痛。」
Q：「低B，咁你做正經嘢啦，唔會搞到好夜㗎？」呢個女人係咪以為自己係我老婆，成日都要知我去咗邊…雖然我都好清楚妳幾時同條仔扑嘢。話時話好似無扑一段時間…
其實我而家要做嘅嘢咪又係為咗妳，重要仆去尖嘴…
搞完一大輪之後就聽到有人嗌咪叫交叉仔，啱啱俾QQ惡攪完令我凝住有人叫我入房割包皮咁。
「得你一個？」係一個女主任嘅物體。
我：「係呀，呢度係張form，我爹地已經簽咗名，呢度係佢張身份證，同埋我本舊passport…」可能你哋會懷疑我點解有護照，其實…我三歲嗰陣試過全家去台灣旅行㗎，雖然我完全唔知自己去嚟為乜…




另外我點解有爹地身份證？因為佢成日唔喺香港身份證跟身其實無用，佢主要係攞護照同海員證喺身，留張身份證喺度以防萬一，等我可以幫佢開授權書做某啲嘢，雖然我都未試過。
「我知道…咁佢人呢？」
我：「佢話等咁耐都黐鬼線，公務員做嘢慢到飲咗豬油咁，頂唔順就落咗去行街，重話我牛高馬大點解重要陪我嚟申請護照喎…」