thriXt Qantasy 純文字安眠之作 (New: - U2K - 一直上架): K681

星期一返到學校，大家終於見到壁報嘅成品，大部份人都係呆咗一呆，尤其係右手邊嗰格幽蘭嘅英文書法；至於我哋就只係當有功課交就算，反正女神們覺得佢哋有咁嘅出品實在係合情合理之至。有啲同學都開始喺度裝飾自己嗰格信箱，例如啲女仔會喺上面加貼紙同花邊咁，至於我嗰格鈉，唔知幾時又多咗幾封嘢喺入面，但佢哋又話唔准拆住，要等放學評判睇完先。
班主任入到嚟，望完嘅表情一樣係呆咗。
鄧：「你哋班…有功課交就好，但我想問下有塊咁嘅嘢放喺度，測試考驗嗰陣點攪？」
豬：「無人叫你擰轉睇後面喎，睇前面同側邊重易啦…」
U：「關於呢個問題我哋都有諗過，所以準備咗塊紅絨布遮住，一陣評判嚟之前都可以遮住先。」兩位班長各執一邊拉開塊布，啱啱可以遮住晒，足見塊布有幾長。
鄧：「咁大塊絨布，要買都唔平㗎喎…」
V：「屋企啲剩餘物資嚟，用到咪用囉。」
鄧：「另外呢度有成百幾格，你哋得三十四個人咋喎。」
U：「簡單，行完一個循環之後又再輪過就得，而個主人就要記低晒自己係邊幾格。」
鄧：「咁一號下一格係三十五，再之後就係…」數手指中…




U：「Miss唔使咁麻煩㗎，妳將個數MOD三十四就可以知道係屬於邊個。」
鄧：「我邊識計啲咁嘅數喎。」
陳：「氫，溴，Tm，同鐒都係我嚟，排頭嘅多一粒…」位一號有氣無力咁講出嚟，再一次證明行頭無好帶挈。
鄧：「一個人有咁多格信箱，可以有乜用途？」
U：「嗯，我都有諗過，不如第一格就學業用，第二格就校務活動用，第三格就係私人用途…」
鄧：「咁嘅話頭兩排實係吉嘅都似。」
豬：「妳實在太清楚我哋喇，其實有第三個已經夠用。」
鄧：「如果要追功課，係咪貼塊label去第一個箱就得？」
「無有錯，用埋紅色label就啱，好似追債淋紅油咁。」
U：「Miss，其實上面個group一至八都放到信㗎，不如妳都揀返格吖，group一好唔好呀？」




鄧：「唔好，我唔想收投訴信。」
慕：「班主任唔好咁灰啦，可能係表揚信嚟呢。」
鄧：「都咪攪我，我無事無幹有糧出就得。」
豬：「Miss妳咁hea㗎，點為我哋做一個好榜樣呢？」
鄧：「無問題㗎喎，你哋都可以無事無幹攞孖星。」
Miss蜜運中，心情唔錯，但不改佢神神化化嘅教學方式。今堂係作文，佢講完十五分鐘就喺度遊來遊去，亦係佢呢份工其中最hea嘅一part，雖然改文其實好痛苦。
我：「Miss，上面個四撞咗呀，妳咁樣會一直錯落去。」