thriXt Qantasy 純文字安眠之作 (New: - U2K - 一直上架): K670

Y：「喂，你重企喺度？彈完咁耐你唔使㩒停㗎咩？」
我：「佢N多個軟件喺入面，妳想點cut都得。」
Q：「不如我哋試下mix埋頭先錄嗰啲track咯。」
Z：「好呀，我都想玩下。」然後四個走咗入去。
天王星一個喺度啪啪啪，噗噗啪，我睇到都覺得無奈，明明自己唔係做呢行，但就要睇住自己四個姐妹玩得咁開心，我就話齋嚟陪下佢哋啫；所以話禍從口出係真嘅，一時之氣講咗句嘢就攪到自己要受苦，但佢係要咁硬頸，我就話會放過佢啫…
見佢咁努力大家都唔好意思騷擾佢，因為明知個樽頸位就係喺佢度，而啲壓力又係佢自己製造出嚟。
V：「呼，mix完，原來要對齊啲track都唔易。」
Z：「但無咗鼓聲聽落硬係差緊啲嘢。」
Q：「唔好咁大聲啦，佢已經練到滴緊汗㗎喇…」
Z：「唔知道下個禮拜有無機會一齊jam到歌呢？」


Y：「機會渺茫，喺出賽前一個禮拜jam到就或者。」
Z：「其實…有無可能換妳去打鼓好啲，頭先都見妳似模似樣咁，而佢做主唱就唔使玩樂器喇。」
V：「我打唔係問題，但主音結他邊個負責喎，妳都無可能負責晒兩條track啦，violin啲聲又好多並行嘅。」
Y：「按道理唔會好啲，就算我哋可以負責晒啲樂器，佢自己solo vocal一樣咁艱辛，而且我無聽過佢喺唱歌方面有啲乜特別才能。」
Q：「我都咁話，獨唱衰咗就要自己承受晒，都係分攤返好啲，我哋去玩下啫，衰咗咪一齊share囉。」
Y：「妳梗係無所謂，個傻女諗住一定要贏㗎。」
V：「其實有無可能用錄音track解決？」
Y：「實有㗎，不過事主一定唔會肯咁樣做。」
V：「其實我差唔多要走喇，臨走想一齊jam多次，不如我哋叫埋天王星一齊玩咯。」
Z：「但係，好明顯佢唔會跟到㗎喎，唔好難為佢啦。」


V：「無所謂嘅，整到個譜易啲咪得囉，太難就係人都打唔到㗎啦。」
Z：「但係可以點改個譜？我哋都無人玩開呢啲嘢…」
V：「得啦，信我！…Uranus，可唔可以幫我哋打鼓呀？」
U：「欸…但係我重喺練習模式嘅第二關…」
V：「唔緊要，妳去返月光花個譜度，剩係負責打hi-hat同snare，其他鼓就由得佢先！」
U：「其實我無學過啲鼓叫乜嘢名打乜嘢名。」
V：「即係藍色呢個！同埋黃色呢個！重有，阿爽過嚟幫手打cymbal同埋踩bass！」
我：「大小姐，妳唔係認為我就會識佢哋叫乜名呀？」
V：「你激死我喇！就係最右手邊個鼓同右腳制！右鼓全部八拍㗎咋，你打開機應該打到嘅，至於隻腳你得閒又肯定踩得啱就踩一下啦，唔好亂嚟就得。」